Governu Timor-Leste

Ministru Turizmu, Komérsiu no Indústria (MTCI)-sigla portugés, José Lucas do Carmo da Silva, partisipa enkontru dahuluk asuntu ekonómiku CPLP nian liuhosi plataforma virtuál ho tema “I Reunião de Ministros da Área Económica, Comercial e Finanças da CPLP” ne’ebé prezide husi nasaun Angola hafoin realiza iha kapitál Luanda, iha sesta-feira, 29 fulan-abríl 2022.

Iha sorumutu ne’e, reprezentante kada país foti kestaun bazeia ba esperiénsia idak-idak, tanba ekonomia mundiál hasoru krize barak durante tinan kotuk, liuliu krize petróleo no COVID-19, agora daudaun funu Rúsia ho Ukránia no nasaun CPLP laiha rejiaun ida de’it, hamutuk, hanesan difikuldade tanba do’ok malu, bele sai vantajem iha rejiaun ka bloku sira partisipa iha sira nia rejiaun jeográfika no ekonómika.

Enkontru ida ne’e hodi trata akordu atu membru husi nasaun sira nia sidadaun bele la’o livre, halo negósiu, esporta sasan ba malu, hamenus burokrasia no buka maneira atu hetan finansiamentu ba indústria iha CPLP nian laran hodi fasilita no hasa’e kresimentu ekonómiku iha mundu. 

Sei iha estudu viabilidade atu verifika liu husi finansiamentu sira, sei hetan finansiamentu ne’ebé di’ak iha futuru, nune’e bele reforsa liutan ekonomia nasaun ida-idak nian.

Nune’e, nasaun 8 sira ne’e asina akordu ida atu hala’o nafatin servisu tékniku atu buka mekanizmu legál hodi tau importánsia no prátika liga ho asuntu ne’ebé deside iha enkontru entre país CPLP nian.

Enkontru ne’e lidera husi Angola no hetan partisipasaun íbrida (prezensiál no virtuál).