Governu lansa medida hodi apoia operadór sira transporte públiku nian no atividade setór sira seluk nian
VIII Governu Konstitusionál aprova ona atribuisaun subsídiu nian sira atu hamenus impaktu hosi aumentu presu kombustivel nian sira, tanba funu iha Ukránia.
Hodi garante estabilidade presu kombustivel nian sira no hodi evita konsekuénsia prejudisiál sira ba ekonomia no ba konsumidór sira, Governu deside halo intervensaun iha merkadu kombustivel sira liuhusi atribuisaun subsídiu nian sira.
Medida ida-ne’e sei benefisia atividade hosi setór sira ne’ebé afetadu liu ba aumentu folin kombustivel nian sira, hanesan operadór transporte rodoviáriu públiku nian sira, no mós operadór transporte aéreu no marítimu nasionál sira, no kompradór sira kombustivel nian ne’ebé atu hala’o atividade agríkola no peska nian.
Subsídiu ne’e sei halo liuhusi vale deskontu nian (voucher) ida atu uza iha estasaun sira ne’ebé maka fa’an kombustivel ho ninia montante ne’ebé korrespondente ba 100% husi valór diferensa nian entre folin médiu gazolina ka gazóleu litru ida nian, iha fulan-dezembru tinan 2021 no folin gazolina ka gazóleu litru ida nian iha data fó-sai voucher kombustivel nian, ho konsiderasaun ba tipu kombustivel nian no ninia karakterístika sira.
Iha nia prátika, medida ida-ne’e sei permite katak benefisiáriu sira sei selu de’it valór médiu kombustivel nian ne’ebé pratika iha fulan-dezembru tinan kotuk.
Ministériu Transportes no Komunikasoins, ne’ebé responsavel ba pagamentu subsídiu nian sira ba operadór transporte rodoviáriu públiku nian sira, ba operadór transporte aéreu no marítimu nasionál sira, no Ministériu Agrikultura no Peskas, ne’ebé responsavel ba subsídiu ba kompradór kombustivel nian ne’ebé maka atu hala’o atividade agríkola no peska nian, atu besik remata prosedimentu sira ne’ebé nesesáriu hodi nune’e iha tempu badak bele hahú pagamentu subsídiu nian.
Dekretu-Lei Nu. 18/2022, 19 fulan-abril, ne’ebé estabelese subsídiu sira ne’e aprova ona hosi Governu iha Sorumutuk Konsellu Ministrus nian iha loron 13 fulan-abril tinan 2022, no promulga ona husi Prezidente Repúblika iha loron 19 fulan-abril liubá.
