Governu Timor-Leste

Governu Timor-Leste, liuhusi Sekretaria Estadu Ambiente no Grupu Traballu kona-ba Alterasaun Klimátika, ho apoiu husi parseiru sira dezenvolvimentu nian, iha loron 29 to’o loron 30 fulan-marsu, organiza ona Konferénsia Nasionál dahaat nian kona-ba Alterasaun Klimátika.

Konferénsia ne’e hala’o iha auditóriu Ministériu Finansas nian, iha Díli no ho nia tema “Hamenus impaktu hosi alterasaun klimátika atu proteje ita-nia ekosistema, saúde no seguransa ai-han”.

Durante loron rua hosi konferénsia ida-ne’e, ninia objetivu mak atu kria fatin reflesaun nian ida kona-ba asaun no mekanizmu sira atu hamenus efeitu sira ne’ebé relasiona ho alterasaun klimátika.

Iha abertura husi eventu ida ne’e, Ministru Koordenadór Asuntus Ekonómikus Joaquim Amaral, ne’ebé reprezenta Primeiru-Ministru, afirma katak “Timor-Leste iha obrigasaun atu reforsa nia kapasidade reziliénsia no prevensaun nian ba efeitu sira husi alterasaun klimátika.

Joaquim Amaral garante katak Governu koopera hela ho sosiedade sivíl no parseiru nasionál no internasionál sira iha prevensaun ba akesimentu globál.

Sekretáriu Estadu Ambiente, Demétrio do Amaral de Carvalho, deklara katak “atu kombate alterasaun klimátika ita tenke halo ho koletivu”, hodi salienta importánsia kontribuisaun nian husi sidadaun hotu-hotu no parseiru sira dezenvolvimentu nian.

Iha fulan-dezembru liubá, Governu aprova ona Polítika Nasionál Alterasaun Klimátika nian, ne’ebé estabelese deklarasaun ida loloos tuir prinsípiu polítiku sira ne’ebé determina mekanizmu sira ne’ebé sei sai hanesan  referénsia atu lee no interpreta lei sira ne’ebé atu adota hodi hatán ba situasaun emerjente sira alterasaun klimátika nian.   Adosaun ba polítika ida-ne’e, permite la’ós de’it atu haforsa artikulasaun koordenada entre ministériu sira no atu evita duplikasaun ba medida sira no aplikasaun ba polítika dezatualizada sira, maibé permite mós atu estabelese estrutura baze iha ne’ebé polítika sira aban-bainrua nian kona-ba alterasaun klimátika (setoriál no tranzversál sira) sei identifika no prioritiza.

Durante loron rua Konferénsia nian, Ministériu Saúde hamutuk ho Organizasaun Mundiál Saúde nian fornese mós ezame no akonsellamentu médiku gratuitu sira.