Governu Timor-Leste

Prezidente Repúblika, Francisco Guterres Lú Olo, ohin, loron 22 fulan-marsu tinan 2022, fó pose ba membru Governu Konstitusionál VIII foun na’in-haat, iha serimónia ida ne’ebé hala’o iha Palásiu Prezidensiál Nicolau Lobato, iha Dili.

Membru Governu na’in-haat ne’ebé ohin simu ona pose maka: Tiago Amaral Sarmento ne’ebé sei lidera Ministériu Justisa, Abel Pires da Silva ne’ebé asume kargu Ministru Obras Públikas, António Freitas ne’ebé sei sai Vise-Ministru Finansas foun no Júlio da Conceição “Loro Mesak” ne’ebé simu ona pose nu’udar Sekretáriu Estadu ba Asuntus Kombatentes Libertasaun Nasionál.

Primeiru-Ministru, Taur Matan Ruak, hahú nia diskursu ho fó parabéns ba “kandidata no kandidatu hotu ne’ebé partisipa ona iha eleisaun, hatudu respeitu malu no toleránsia, iha festa demokrátika ida-ne’e” no dezeja “boa sorte ba kandidatu sira ne’ebé ho votu barak liu no agora atu ba segunda volta eleisaun nian”.

Xefe Governu aproveita biban ne’e hodi fahe “rezumu badak ida hosi rezultadu prinsipál sira ne’ebé hetan ona durante ninia mandatu daudaun ne’e, nune’e mós kona-ba dezafiu prinsipál sira ne’ebé, koletivamente, sira sei hasoru iha oin”.

Husi rezultadu sira ne’ebé hetan ona iha setór sosiál, Primeiru-Ministru destaka reforsu “investimentu iha modernidade ba sistema no infraestrutura sira saúde nian hodi garante kualidade no kapasidade resposta nian ba krize foun no surtu infetokontajiozu sira ne’ebé sei mosu iha futuru”.  Iha setór ida-ne’e refere mós investimentu “millaun 177 ba nutrisaun no ba seguransa ai-han nian hodi garante moris saudavel, moris naruk no ksolok ba ita-nia sidadaun sira, .

Iha Edukasaun salienta “lansamentu ba fatuk dahuluk ba investimentu boot konstrusaun foun Cidade Universitária de Aileu, ne’ebé ho objetivu atu simu estudante rihun 10” no “investe ba formasaun profisionál hodi hatán ba nesesidade urjente sira hosi traballadór kualifikadu sira liuhusi harii Sentru Exelénsia Maun-de-Obra Kualifikada ida ne’ebé modernu no tinan-tinan sei simu formandu rihun ba rihun”.

Iha nivel abitasaun nian, Xefe Governu refere “konstrusaun ba abitasaun sosiál sira ne’ebé digna ba ita-nia populasaun, liuliu ba família sira ne’ebé kbiit-laek liu no Veteranu sira Luta Libertasaun Nasionál nian”.

Kona-ba rezultadu sira ekonomia nian, destaka projetu turístiku sira ba transformasaun área atuál Portu Dili no Cristo Rei nian, “rejistu Tais hanesan patrimóniu imateriál Umanidade” no “inísiu ba esplorasaun petrolífera, iha bloku terrestre no marítimu tasi mane nian”.

Iha konetividade Primeiru-Ministru ko’alia kona-ba “konstrusaun ba Portu foun iha Tibar, hahú ona iha tinan 2018 no  ninia inaugurasaun prevee ona ba fulan-outubru”, “no hahú halo operasaun Roo foun no modernu hodi transporta pasajeiru no produtu merkadu nian, Berlin-Ramelau” no “konstrusaun ba Aeroporto Internacional Presidente Nicolau Lobato ida ne’ebé modernu, iha Dili”.

Xefe Governu refere mós “kontinuidade no reforsu ba Programa Cesta Básica nian”, ho “investimentu dolar amerikanu millaun 80”, ne’ebé “sei kontinua ho loloos hodi promove rekuperasaun ekonomia” no “rezultadu iha reforma institusionál sira, ne’ebé esforsa atu hasai Timor-Leste husi lista Estadu Frajil sira nian, foka ona iha área fundamentál haat” – Reforma Administrasaun Públika, Reforma Jestaun Finansas Públikas no Reforma Fiskál, Reforma Desentralizasaun Administrativa no Reforma Judisiária.

Taur Matan Ruak agradese “ba Membru Governu sesante sira hotu ba dedikasaun no empeñu hotu ne’ebé hatudu ona iha tinan tolu ikus ne’e, ne’ebé kontribui barak ona ba rezultadu koletivu sira ne’ebé Governu alkansa ona, hodi dezeja ba hotu-hotu votu susesu di’ak iha nivel pesoál, familiár no profisionál”. Remata ninia diskursu, ho “liafuan ida, sentidu agradesimentu nian ba membru Governu na’in haat ne’ebé ohin simu pose, hafoun konfiansa ne’ebé depozita ona no dejeza katak bele ajuda Governu hodi manan iha dezafiu sira dezenvolvimentu nasionál ho forma inovadora, empreendedora, leál no konstrutiva”.