Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães no Embaixadór foun Austrália nian iha Timor-Leste, William Terrence Costello, hala’o sorumutuk ba dahuluk, iha loron 10 fulan-marsu tinan 2022, iha Palásiu Governu, husi kedas diplomata ne’e entrega ninia karta kredensiál sira ba Prezidente Repúblika, iha loron 25 fulan-fevereiru liubá.

Iha sorumutuk ne’e ko’alia kona-ba área oin-oin kooperasaun nian, liuliu iha área sira saúde, protesaun sosiál, governasaun di’ak no infraestrutura sira.

Embaixadór foun ne’e hatudu ninia ksolok tanba bele mai iha Timor-Leste no reafirma objetivu atu kontinua hametin kooperasaun entre país rua.

Ministru Fidelis Magalhães hanoin fali kona-ba relasaun kooperasaun nian ne’ebé eziste kleur ona ho Austrália no salienta importánsia país rua nian, hanesan viziñu di’ak, atu hametin liután sira-nia relasaun. 

Entre área oioin hosi serbisu konjunta sira, Governante no diplomata ne’e ko’alia kona-ba kooperasaun ba luta kontra COVID-19, ne’ebé hetan apoiu maka’as hosi Austrália, liuliu ba fornesimentu vasina sira.

Diplomata ne’e hahii ba esforsu Governu nian ba kombate COVID-19 no afirma katak Timor-Leste nu’udar ezemplu ida ba susesu.

Ko’alia mós kona-ba mobilidade laborál, ho hanoin atu aumenta númeru traballadór timoroan sira nian iha Austrália, liuliu iha área agrikultura no otelaria.

Ministru ho Embaixadór diskute mós kona-ba prioridade sira Governu nian kona-ba administrasaun públika no programa kooperasaun oioin Austrália nian hanesan programa GfD no PNDS.

Diplomata ne’e manifesta mós disponibilidade Austrália nian hodi apoia ba implementasaun projetu rede fibra ótika nian, hodi permite serbisu sira ‘internet’ nian ho lalais, fiável no asesivel liu ba konsumidór no empreza sira iha Timor-Leste no mós hodi fó apoiu ba projetu reabilitasaun kona-ba Aeroporto Internacional Presidente Nicolau Lobato.