Sorumutuk Nasionál da-5 husi Komité Diretivu Projetu Janela Únika nian
Vise-Ministra Finansas, Sara Lobo Brites, kinta-feira, loron 17 fulan-fevereiru, prezide sorumutuk dalimak Komité Diretivu Projetu nian (Project Steering Committee - PSC) Timor-Leste Trade Single Window System, ne’ebé dezenvolve husi UNCTAD ASYCUDA, koñesidu mós hanesan projetu Janela Únika Nasionál Timor-Leste nian.
La hanesan ho sorumutuk dahaat liubá PSC nian, ne’ebé ninia membru sira de’it maka partisipa, maka hanesan Ministériu Finansas, Autoridade Aduaneira, funsionáriu sira ASYCUDA nian no Ekipa Nasionál ba Implementasaun Projetu nian, sorumutuk da-5 ne’e mós konvida reprezentante sira husi ajénsia governamentál sira seluk. Reprezentante sira hosi Diresaun-Jerál ba Asuntu ASEAN nian, hosi Ministériu Negósius Estranjeirus no Kooperasaun mós partisipa iha sorumutuk ne’e, hanesan observadór sira. 
Vise-Ministra, Sara Brites, iha ninia intervensaun sira fó elojiu ba progresu sira ne’ebé projetu ne’e alkansa ona to’o ohin loron no apela ba entidade governamentál sira hotu atu envolve ho proativu iha faze sira hotu implementasaun projetu ne’e nian, hodi garante katak meta sira ne’ebé prevee ona ba tinan 2022 nian bele alkansa hotu. Projetu ida-ne’e sei permite atu simplifika, fasilita no hamenus kustu no tempu ba realizasaun negósiu nian sira iha país.
To’o ohin loron, fó ona asesu ba Janela Únika Nasionál Timor-Leste nian ba TradeInvest, ba Unidade Nasionál Ozonu nian, hosi Sekretaria Estadu Ambiente, ba Diresaun Nasionál Komérsiu Esternu nian, hosi Ministériu Turizmu, Komérsiu no Indústria, ba APORTIL I.P. no ba SAMES I.P.. Serbisu sira la’o hela hodi kontinua implementasaun ba sistema janela únika no prevee ona katak ajénsia governamentál relevante sira seluk sei liga ba sistema ida-ne’e iha fulan hirak tuirmai.
