Ministra Negósius Estrangeirus no Kooperasaun Timor-Leste nian hala’o sorumutuk ho ninia omóloga australiana hodi diskute resposta ba COVID-19, mobilidade laborál no kooperasaun ekonómika
Ministra Negósius Estrangeirus no Kooperasaun, Adaljiza Magno, hala’o sorumutuk ho Ministra Negósius Estrangeirus Austrália nian, Senadora Marise Payne, iha loron 10 fulan-fevereiru tinan 2022, iha Camberra, Austrália.
Ministra rua ne’e diskute asuntu bilaterál, rejionál no multilaterál sira lubuk ida, inklui COVID-19, mobilidade laborál no kooperasaun ekonómika. Membru governu rua ne’e kompromete atu hametin relasaun bilaterál sira entre nasaun rua ne’e nian.
Kona-ba COVID-19, Ministra Payne koa’lia liu ba serbisu Timor-Leste nian ne’ebé di’ak tebes iha implementasaun ba medida sira prevensaun propagasaun virus nian.
Ministra Magno agradese ba Governu Australianu ba parseria iha área dezenvolvimentu nian no afirma katak “Austrália maka doadór boot liu ba dezenvolvimentu Timor-Leste nian” no agradese “apoiu kontínuu”.
Ministra australiana fó sai mós notísia di’ak katak aviaun Quantas sei halo vou komersiál ida permanente ba Timor-Leste no ministra Adaljiza Magno destaka katak ida-ne’e sei fó-dalan atu ema barak vizita Timor-Leste, loke oportunidade ba turizmu no investimentu.
Iha nivel multilaterál, ministra timoroan ne’e husu apoiu Austrália nian ba kandidatura Timor-Leste nian ba iha Konsellu Direitus Umanus.
Kona-ba asuntu mobilidade laborál nian, ministra Payne hateten katak empregadór australianu sira valoriza tebes traballadór timoroan sira no destaka katak Austrália sei simu traballadór barak liután husi Timor-Leste.
Ministra negósius estranjeirus na’in-rua ne’e konklui sorumutuk ho asinatura ba memorandu entendimentu nian ida kona-ba Programa Mobilidade Laborál Pasífiku Austrália nian (Pacific Australia Labour Mobility (PALM)).
