Governu Timor-Leste

Ohin, loron 27 fulan-novembru tinan 2021,Governu Timor-Leste simplifika ona prosesu iha komérsiu internasionál hodi hasa’e funsionalidade ba sistema Janela Únika Eletrónika ne’ebé utiliza hodi deklara kona-ba importasaun no esportasaun ba departamentu aduaneiru país ne’e nian. Sistema ne’e mós liga ona departamentu governamentál sira-seluk ba sistema ida-ne’e, ne’ebé signifika katak importadór no esportadór sira sei iha prosesu burokrátiku ne’ebé uitoan de’it ona atu tuir iha komérsiu internasionál.

Ministériu Finansas liuhusi Autoridade Aduaneira, liga ona Ministériu Turizmu, Komérsiu no Indústria; Ministériu Agrikultura no Peskas; Ministériu Saúde (SAMES, I.P) no Ministériu Transportes no Komunikasoins (APORTIL. I.P) ba funsionalidade sira foun ne’ebé fornese husi sistema ASYCUDA (Janela Únika Eletrónika) país nian.

Iha fulan-maiu tinan 2017, Timor-Leste hili ASYCUDA World nu’udár plataforma atu dezenvolve Sistema Janela Únika Nasionál iha Timor-Leste. Sistema ne’e hanesan plataforma automátika no janela únika ida, ne’ebé liuhosi nia Autoridade Aduaneira, ministériu relevante sira hotu, ajénsia governamentál sira no operadór komersiál sira bele fahe no troka informasaun tuir padraun, hodi tulun komersiante sira atu kumpre rekizitu regulamentár relevante sira ba dezalfandegamentu. Iha liafuan seluk, Janela Únika Nasionál disponibiliza prosesu inskrisaun on-line ne’ebé oferese simplifikasaun, seguransa, fasilitasaun, padronizasaun no armonizasaun. Iha parte ne’e, hamenus ona kustu atu halo negósiu internasionál, habadak tempu dezalfandegamentu, oferese tranzasaun lahó surat-tahan no hadi’a kontrolu kona-ba movimentasaun merkadoria sira.

Programa Janela Únika Nasionál harii tuir implementasaun sistema automátika Alfándega nian, ho susesu, ASYCUDAWorld, iha Timor-Leste, hanesan parte kooperasaun nian ba prazu naruk entre Governu Timor-Leste no Konferénsia Nasoins Unidas nian kona-ba Komérsiu no Dezenvolvimentu (UNCTAD), hodi kontribui ba esforsu kontínuu hodi hadi’a finansas públikas, ne’ebé haree liu ba aumentu efisiénsia iha prosesu sira dezalfandegamentu nian.

Aleinde lansamentu, ohin-loron mós ita asiste asinatura protokolu kooperasaun téknika entre Komisáriu Alfándega no Diretór-Jerál Komérsiu husi Ministériu Turizmu, Komérsiu no Indústria, Diretór-Jerál ba Kooperasaun no Dezenvolvimentu Institusionál husi Ministériu Agrikultura no Peskas, Prezidente APORTIL, I.P., no Prezidente SAMES,I.P. Protokolu hirak ne’e deskreve akordu koletiva entre parte signatária atu koopera iha prevensaun infrasaun aduaneira sira, troka informasaun sira fiskál no aduaneira nian sira no prevensaun no kombate kona-ba infrasaun sira ba lei ne’ebé abranje iha kompeténsia ida-idak.

Ministru Finansas Repúblika Demokrátika Timor-Leste, Rui Augusto Gomes, enkoraja ministériu no ajénsia governamentál relevante sira atu kontinua foti medida pro-ativa no atu kolabora hodi uza Sistema Janela Únika Eletrónika Nasionál, hodi hasa’e fasilidade komérsiu internasionál.