Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hala’o sorumutu ho Enkarregadu Negósius husi Embaixada Estadus Unidus Amérika nian iha Timor-Leste, Thomas Daley, iha loron 8 fulan-novembru tinan 2021, iha Palásiu Governu, Dili.

Durante sorumutu ne’e, diplomata  informa ba Ministru katak Timor-Leste rejista dezempeñu boot iha ranking indikadór polítiku nian sira ne’ebé selesiona husi ajénsia norteamerikana Millennium Challenge Corporation (MCC) hodi determina país sira-nia elejibilidade ba sira-nia programa asisténsia nian durante tinan finanseiru 2022.

Rezultadu husi análize ne’e, ne’ebé sei publika ofisiálmente iha loron aban, hatudu katak husi indikadór 20 ne’ebé analiza ona, indikadór 15 maka pozitivu, ida tan kompara ho tinan uluk. Valór ida-ne’e maka valór ne’ebé aas liu nafatin no permite Timor-Leste atu mantein nia elejibilidade hodi asesu ba programa sira  ne’ebé parseria ho MCC.

Prosesu selesaun nian hala’o liuhusi informasaun sira husi entidade esterna independente sira, hodi bele garante komparasaun objetiva ida ba país kandidatu sira hotu.

Sorumutu ne’e sura mós ho partisipasaun husi Diretór Ezekutivu Nasionál Compact Development Team (CDT-TL) nian, Embaixadór Constâncio Pinto, ne’ebé responsavel ba ekipa dezenvolvimentu kompaktu  hosi projetu dezenvolvimentu sira ne’ebé  MCC finansia.

Konsellu Administrasaun MCC nian selesiona ona Timor-Leste ba Programa Compacto iha fulan-dezembru tinan 2017, no Ministru Fidelis Magalhães asina, iha tinan 2018,  Akordu Finansiamentu Inisiál ho MCC ne’e, atu kria ekipa ida (CDT-TL) ne’ebé integra iha programa Millennium Challenge Compact, no ne’ebé iha responsabilidade atu identifika setór ekonómiku sira ne’ebé sei dezenvolve durante implementasaun programa ida ne’e.

Daudaun ne’e, CDT-TL no MCC hala’o hela estudu ikus hirak ne’ebé sei fornese dadus no informasaun nesesária sira hodi konklui detalle sira no ámbitu konsesaun ba projetu sira ne’ebé selesiona ba área Bee, Saneamentu no Drenajen no ba área Edukasaun.

Maske iha limitasaun sira,  tanba pandemia COVID-19, CDT-TL, ho apoiu husi MCC,  kontinua servisu hodi finaliza estudu viabilidade nian sira, atu nune’e, iha tempu badak, bele asina akordu kompaktu ho MCC.