Parlamentu Nasionál autoriza Prezidente Repúblika atu deklara renovasaun Estadu Emerjénsia ba loron 30 tan
Hafoin Governu husu ba Prezidente Repúblika no paresér pozitivu sira hosi Konsellu Estadu no Konsellu Superiór Defeza no Seguransa, ohin, loron 26 fulan-outubru tinan 2021, Parlamentu Nasionál autoriza Prezidente Repúblika hodi renova deklarasaun estadu emerjénsia ba dala 19, husikedas pandemia COVID-19 mosu, husi tuku 00:00 iha loron 30 fulan-outubru tinan 2021 to’o oras 23:59 loron 28 fulan-novembru tinan 2021.
Proposta Lei autorizasaun ba renovasaun deklarasaun estadu emerjénsia hetan aprovasaun husi deputadu 60 ne’ebé marka prezensa iha sesaun plenária, ho votu afavór 43, abstensaun 12 no votu kontra lima.
Hafoin publikasaun Dekretu Prezidente Repúblika nian, Governu, liuhusi reuniaun Konsellu Ministrus aban, sei aprova mós medida sira ba ezekusaun deklarasaun estadu emerjénsia ne’ebé sei vigora hahú husi loron 30 fulan-outubru.
Iha mensajen ne’ebé dirije ba Parlamentu Nasionál, Prezidente Repúblika, Francisco Guterres Lú Olo, afirma katak “maske konfirma tendénsia dezaselerasaun iha ritmu alastramentu nian” no “mézmuke prosesu vasinasaun kontra COVID-19 iha Timor-Leste la’o hela tuir saida maka ita hein, ita tenke atentu nafatin”.
Prezidente Repúblika destaka ona katak “Estadu Timorense tenke asegura, ho razaun ba protesaun saúde públika nian, ne’ebé iha mekanizmu sira adekuadu hodi konkretiza saúde públika, atu previne no redús oportunidade importasaun virus ida-ne’e nian, la’ós tenke Estadu de’it, maibé ita ida-idak, iha medida posibilidade reál sira, hodi nafatin matan moris no neon na’in.
Iha ninia intervensaun, Ministru Prezidénsia Konsellu Ministrus, Fidelis Manuel Leite Magalhães, ne’ebé reprezenta Primeiru-Ministru, Taur Matan Ruak, salienta katak importánsia husi vasinasaun “nu’udár instrumentu efikás liu hodi kombate moras aat ida-ne’e no imunizasaun ba grupu iha nivel lokál, munisipál no nasionál” no nia afirma katak “Governu konsiente katak ho vasina maka determina ritmu hodi filafali ba normalidade, nune’e ami nafatin kompromete atu atinje, to’o tinan ida-ne’e nia rohan, ho objetivu atu imuniza pelumenus 80% (porsentu ualunulu) husi ema elejível sira husi ita-nia populasaun”.
Ukun-na’in ne’e hateten katak vasina kontra COVID-19, “ne’ebé ninia benefísiu sira boot liu fali risku sira”, aleinde salva moris, “bele kontribui ba reforsu imajen internasionál Timor-Leste nian nu’udár destinu seguru ida, la’ós de’it iha Eleisaun Prezidensiál sira ne’ebé sei realiza iha tinan oin, maibé mós atu ita bele simu turista, investidór no altu dignatáriu internasionál sira, hanesan vizita Sua Santidade Papa Francisco nian, ne’ebé ita hein hela ho esperansa boot, no prevee ona ba semestre daruak tinan 2022.
Ministru Fidelis Magalhães destaka ona katak “períodu foun husi vijénsia estadu emerjénsia ida-ne’e nian sei marka husi inísiu kampaña imunizasaun ba foin-sa’e sira husi idade tinan 12 to’o 17” no katak “ renovasaun ba deklarasaun estadu emerjénsia, tuir ita hatene, nu’udar fundamentál, atu konsolida reziliénsia País nian no reforsa rezisténsia Timoroan sira-nian, hodi haforsa kondisaun sira iha rai-laran ba normalidade pós-COVID-19 ne’ebé foun no ita hein hela, no ne’ebé besik mai hela ona daudaun iha ita nia rain.
