Governu inaugura tan Uma Kbiit La’ek iha Aileu
Ministru Administrasaun Estatal, Sr. Miguel de Carvalho, akompañadu hosi Administrador Munisípiu Aileu, Abel da Conceição, Diretora Nasional PNDS, Sra. Claudina Soares Pinto, no komitiva, kinta semana ne’e, inaugura tan Uma Kbiit La’ek (UKL) tolu ba família benefisiáriu kbiit la’ek uma kain tolu iha Suku Tohumeta, Postu Administrativu Laulara, Munisipiu Aileu nian.
UKL ne'e nu’udar polítika VIII Governu Konstitusionál nian lideradu hosi Primeiru-Ministru Taur Matan Ruak, ho objetivu atu bele ajuda hakmaan família kbiit la’ek sira ba uma mahon ida seguru no dignu, hodi kumpri Konstituisaun RDTL artigu 58 kona ba “hela fatin” ; Hateten katak “ema hotu iha direitu ba nia an no nia família atu iha uma ida ho dimensaun no kondisaun di’ak, moos no konfortu atu bele iha intimidade ba ema ida-idak no privasidade familiar no uma mós sai hanesan nesesidade bázika tuir kategoria nesesidade ema nian.
Hafoin inaugura tiha UKL, Ministru Administrasaun Estatal hateten, objetivu VIII Governu Konstitusionál nia polítika mak povu tenke moris di’ak, parte ida hosi moris di’ak mak tenke hela iha uma seguru no dignu, tanba ne'e VIII Governu hahú ho tau matan ba sidadaun sira ne’ebé vulneravel liu ba hela fatin hodi harii uma ba sira.
Xefe Suku Tohumeta, Manuel Soares, hodi benefisiáriu nia naran sente kontente no orgullu ba VIII Governu Konstitusionál ne'ebe mai ho politika di'ak harii uma ba família kbiit la’ek liuhosi Programa Nasionál Dezenvolvimentu Suku (PNDS) no husu atu kontinua polítika ida ne’e, tanba sei iha família barak mak kondisaun uma sei aat no presija Governu nia tulun.
Ba munisípiu Aileu UKL ba etapa dahuluk tinan 2021 hamutuk uma 99, no faze tuir mai sei kontinua iha tinan 2022 ne’ebé hatama ona ba proposta OJE 2022 nian.
Entretantu, tuir relatóriu Sensu 2015 nian, iha uma rihun 200 mak kondisaun la di'ak iha teritóriu tomak.
