Konsulta Planu Estratéjiku Dezenvolvimentu Nasionál (PEDN) kontinua iha sub-distritu Remexio, distritu Aileu
Primeiru-Ministru, Kay Rala Xanana Gusmão, ne’ebé akompanha husi Ministru Infraestrutura, Pedro Lay ho Sekretariu Estadu Obras Públikas, Domingos Caeiro, iha sub-distritu Remexio, distritu Aileu, ne’ebé simu direitamente husi Administradór distritu Aileu, Administradór sub-distritu Remixio no ekipa tradisionál. Antes atu hakat bá, Xefe Governu sei hetan hatais tradisionál, husi Administradór distritu no sub-distritu hodi sae kareta ne’ebe prepara ona no lao ba salaun Parokia Remexio.
Antes atu loke konsulta Planu Estratéjiku Dezenvolvimentu Nasionál (PEDN), dahuluk, Administradór Aileu hato’o nia benvindu ba Primeiru-Ministru ho nia kometiva, tanba Remixio sai hanesan loron dahuluk konsultasaun PEDN iha Distritu Aileu, nune’e mós Administradór Sub-Distritu hato’o jeografikamente Sub-Distritu Remexio nian ba Primeiru-Ministru, katak iha suku 8 Aldeia 27 total populasaun iha rihun sanulu resin ida pontu atus lima hitu nulu resin walu, produtu lokál mak hanesan batar, ai-farina, fehuk, talas, koto, turis, fore no seluktan.
Ai-fuan hanesan Sabraka, ai-nanas, hudi no seluk tan, móris povu nian iha sub-sistritu nakonu ho susar, atu hetan osan dólar ida, ezemplu bainhira ba fa’an ai-farina tahan iha sidade Díli lori karon tolu to’o haat pelumenus hola osan dólar lima, maibe osan dólar tolu selu kareta no hela osan dólar rua atu hola masin, no mina-rai nune’e sira tenke fila mamuk ba uma ne’e realidade ne’ebé akontese iha sub-distritu Remixio.
Iha fatin hanesan Kay Rala Xanana Gusmão, hato’o programa husi Planu Estratéjiku Dezenvolvimentu Nasionál, ne’ebé atu la’o ba oin mak infraestrutura bázikas tamba infraestrutura bazikas hanesan, estrada, eletrisidade, bee mós, telekomunikasaun, agrikultura no agro indústria sai hanesan ponte ba dezenvolvimentu nasional, iha ita nia rain.
Primeiru-Mininistru mós husu ba komunidade atu bele kria dame no pás hodi labele baku malu, tamba kuandu tuda malu, funu, móris iha violensia, ema seluk sei sama ita, nasaun seluk sei naok nafatin ita nia riku soin, maibe husu atu bele dezenvolve estabilidade tamba estabilidada mak domin, dame no pás mak sei lori ita ba dezenvolvimentu iha ita nia rain Timor-Leste.
