Timor-Leste simu lote dahuluk vasina Pfizer nian hodi vasina foinsae sira ho idade tinan 12 to’o 17
Seg. 18 outubru 2021, 11:53h
Ministra Saúde, Odete Maria Freitas Belo, ohin simu ofisiálmente lote dahuluk vasina Pfizer nian no sistema refrijerasaun ida ba temperatura ultrabaixa, iha serimónia ida ne’ebé hala’o iha fatin Servisu Autónomu ba Medikamentus no Ekipamentus Saúde (SAMES), iha Dili.
Lote vasina ne’e, ho doze hamutuk 100.620, to’o iha país ne’e iha loron sábadu liubá, liuhusi mekanizmu COVAX no Governu Estadus Unidus Amérika mak finansia.
Vasina sira-ne’e atu vasina joven sira ho idade hosi tinan 12 to’o tinan 17. Populasaun sira ne’ebé ho idade tinan 18 ba leten sei kontinua simu vasina Astrazeneca no Sinovac.
Preparasaun ba kondisaun sira ne’ebé nesesária hodi rai didi’ak vasina sira ne’e realiza iha SAMES, ho apoiu tékniku no finanseiru husi UNICEF. Prosedimentu operasionál sira ba armazenamentu, transporte, jestaun no aplikasaun vasina nian sira ne’e garante ho apoiu tékniku husi Organizasaun Mundiál Saúde nian.
Tuir dadus ne’ebé horiseik rejista, 67,5% hosi populasaun ho idade tinan 18 ba leten mak simu ona primeira doze vasina kontra COVID-19 no 43,2% kompleta ona vasinasaun.
Daudaun ne’e, munisípiu tolu (Covalima, Vikeke no Dili) nia populasaun liu 80% maka pelumenus simu ona vasina doze ida kontra COVID-19.
Dili maka munisípiu ne’ebé iha persentajen populasaun aas tebes ne’ebé kompleta ona vasinasaun, iha ne’ebé populasaun 71,4% ho idade 18 ba leten simu ona vasina doze rua.
Husi munisípiu 13 ne’e, munisípiu 11 iha ona populasaun liu husi metade ne’ebé maka simu ona vasina doze ida. Ainaru ho Ermera de’it mak hetan persentajen ne’ebé la to’o 50%.
Dezde loron 30 fulan-setembru, membru Governu sira vizita ona munisípiu sira hotu iha país hodi fahe informasaun kona-ba vasina kontra COVID-19 no sensibiliza populasaun ba nesesidade vasinasaun nian. Kampaña vasinasaun ida-ne’e permite ona atu aumenta númeru iha país laran tomak, hodi permite aumenta persentajen nasionál besik 9%.
