Reprezentante Santa Sé nian afirma katak Papa Francisco sei vizita Timor-Leste bainhira maioria hosi populasaun timór simu ona vasina kontra COVID-19
Ministru Prezidénsia Konsellu Ministrus, Fidelis Manuel Leite Magalhães, simu ona Enkarregadu ba Negósius Nunsiatura Apostólika nian, Monseñór Marco Sprizzi, iha loron 14 fulan-outubru tinan 2021, iha Palásiu Governu.
Durante enkontru ne’e Reprezentante Santa Sé nian, kongratula Governu ba ninia kompromisu iha kampaña vasinasaun nian ne’ebé hala’o hela iha munisípiu hotu-hotu iha nasaun ne’e no ne’ebé bele aumenta persentajen nasionál vasinasaun nian kontra COVID-19.
Monseñór Marco Sprizzi afirma katak “igreja, Santa Sé, Vaticano, padre sira, madre sira, Bispu sira, mós iha ona kompromisu atu povu, sarani sira, bele komprende katak vasinasaun maka hahalok domin ida, hahalok responsabilidade ida, hahalok kolaborasaun ida entre ita hotu, hodi alkansa kondisaun sira ba seguransa sanitária no saúde ba ema hotu”.
Enkarregadu ba Negósius Vatikanu nian apela ba populasaun hotu atu vasina kontra COVID-19 no defende katak vasina ne’e seguru, “tanba, karik vasina ne’e perigu, Papa rasik ne’ebé ho tinan 84, sei la simu vasina”.
Monseñór Marco Sprizzi hateten katak Papa Francisco hakarak vizita Timor-Leste iha tinan oinmai. Maibé, vizita ida-ne’e bele realiza de’it bainhira maioria populasaun simu ona vasina. Karik lae, haree ba vizita Papa nian ne’ebé sempre halibur sarani sira ho númeru ne’ebé boot, ne’ebé provoka ema halibur malu barak, vizita ida-ne’e bele fó perigu ba populasaun.
To’o agora, iha Timor-Leste laran tomak, ema besik rihun 490 maka simu ona vasina doze dahuluk nian no ema besik rihun 310 maka kompleta ona vasinasaun.
