Lei Rai Nian sei fó benefisiu ba povu
Ministériu Justisa liu husi Ministra Lúcia Lobato iha loron 5 fulan Maiu tinan 2010 aprezenta proposta lei rain nian ba Komisaun A Parlamentu Nasionál iha Parlamentu Nasionál ne’ebé trata asuntu Konstitusionál, Justisa, Administrasaun Públika, Poder Lokál no Lejislasaun Governu nian no husu Parlamentu Nasionál atu aprova lalais Lei rai nian ne’e atu fó satisfasaun ba populasaun.
Ministra Lúcia Lobato hateten katak “Tempu to’o ona atu ita haree kona-bá situasaun prátika illegál sira ne’ebé durante ne’e ema barak halo, hanesan fa’an ema seluk nia rai, halo deklarasaun falsu hodi sai nain ba ema nia rain, inklui mós fa’an estadu nia rai, nune’e bainhira lei ne’e sai ona, sei resolve hotu situasaun sira hanesan ne’e”.
Kona-ba lei nia benefisiu ba iha populasaun ministra realsa katak, Governu iha dever atu fó indemnizasaun ba sidadaun ne’ebé ninia rai Estadu okupa, bainhira atu implementa lei ne’e, sei kumpri mós artigu ida iha konstituisaun, atu nune’e bainhira estadu hakarak foti populasaun nia rai, riku-soin tenki liu hosi dalan ida nebé justu ne’ebé ita bolu liu hosi lei espropriasaun atu selu indemnizasaun tuir buat ne’ebé povu nian”.
Aleinde ne’e Prezidente Komisaun A iha Parlamentu Nasionál Fernanda Borges hateten “Lei kona-bá rai nian ne’e nesesáriu laiha dúvidas katak, iha lei laran detallu, nia benefisiu, konsekuénsia mak tenki haree didiak. Nune’e haree mós difikuldade ne’ebé povu infrenta, kompara ho lei refere hodi foti desizaun polítika nebé loloos atu bele hala’o ona nia serteza kona-ba nia propriedade privada”.
