Governu Timor-Leste

Ohin loron 7 fulan-setembru tinan 2021, hala’o serimónia entrega  vasina AstraZeneca kontra COVID-19 lote ida ne’ebé oferese husi Portugál

Iha serimónia ne’ebé hala’o iha Aeroportu Internasionál Prezidente Nicolau Lobato, Ministra Negósius Estranjeirus, Adaljiza Albertina Xavier Reis Magno no Ministra Saúde, Odete Maria Freitas Belo, ofisialmente simu vasina kontra COVID-19 husi Embaixadór Portugál iha Dili, José Pedro Machado Vieira .

Ida ne’e nu’udar vasina lote daruak ne’ebé oferese husi Portugal, hafoin lote dahuluk hamutuk rihun 12 ne’ebé to’o ona iha fulan-jullu liubá. Doasaun ida ne’e hanesan parte husi kompromisu Governu Portugeza nian, atu oferese pelumenus 5% husi doze ne’ebé sosa husi Portugál ba País Afrikanu ho Lian Ofisiál Portugeza (PALOP) no Timor-Leste. Portugál, nu’udar Estadu membru Uniaun Europeia nian, ne’ebé mós kontribui ona ba mekanizmu COVAX.

Serimónia entrega nian ne’e marka  mós prezensa husi Reprezentante Organizasaun Mundiál Saúde iha Timor-Leste, Arvind Mathur, Reprezentante UNICEF nian iha Timor-Leste, Bilal Aurang Zeb Durrai no Embaixadór Uniaun Europeia, Andrew Jacobs.

Timor-Leste simu ona vasina besik doze rihun ida husi mekanizmu COVAX , Austrália, Nova Zelándia, Japaun no Portugál.

.Iha pais laran tomak, administra ona vasina liu rihun 600 kontra COVID-19. Populasaun liu metade ho tinan 18 ba leten maka simu ona pelumenus doze dahuluk no besik 28% ne’ebé maka vasina kompletu ona. Iha munisípiu Dili, besik 75% husi populasaun adultu maka pelumenus simu ona doze ida no besik 60% maka hetan ona vasinasaun kompletu.