MAPKOMS enkoraja komunidade manatuto simu vasina
Ministru ba Asuntu Parlamentár no Komunikasaun Sosiál, Francisco da Costa Pereira Jerónimo, enkoraja populasaun Manatuto atu simu vasinasa, maski dadus saúde hatudu katak númeru vasinasaun iha munisípiu ne’e atinji ona porsentu 44 husi totál populasaun liu rihun 46 ne’ebé simu ona vasina.
MAPKOMS hato’o apelu ne’e bainhira halo kampaña nasionál ba vasinasaun kontra COVID-19, tersa-feira, loron 31 fulan-agostu tinan ne’e, iha aldeia Labubu, suku Laku Mesak, postu administrativu Laclo, munisípiu Manatuto.
Ezekuitvu MAPKOMS ne’e husu ba komunidade suku Laku Mesak atu partisipa másima iha programa vasinasaun ne’e, tanba vírus COVID-19 ameasa ona mundu tomak dezde mosu ba dala uluk iha sidade Wuhan-Xina iha tinan 2019, ne’ebé to’o ohin loron kauza ona ema miliaun haat resin mak mate iha mundu, enkuantu Timor-Leste rejista ona númeru mortalidade hamutuk lima-nulu resin, tanba ne’e bainhira la halo prevensaun ho sériu maka Timor sei la lakon husi COVID-19 no sei lakon vida barak hanesan nasaun dezenvolvidu seluk ne’ebé iha rekursu sufisiente maibé labele salva sira nia populasaun rasik.
Iha biban ne’e, Ministru Francisco Jerónimo esplika Estadu hola parte mós iha grupu COVAX ne’ebé lori TImor-Leste asesu ba tipu vasina Astrazeneka, ne’ebé hetan apoiu husi parseiru internasionál sira, iha ne’ebé líder nasionál barak mak simu ona.
Governante ne’e realsa vantajen husi simu vasinasaun dala rua sei iha imunidade forte atu luta kontra moras ne’e se karik infetadu, no fó biban ba komunidade atu halo movimentu bainhira iha nesesidade importante ne’ebé presiza halo. Tanba ne’e, vasina hanesan xave importante hodi prevene vírus COVID-19.
Tuir informasaun ne’ebé mídia asesu husi parte saúde durante kampaña nasionál ba vasinasaun kontra COVID-19 iha aldeia Labubu, totál populasaun, suku Laku Mesak ne’ebé simu ona vasinasaun hamutuk 63, iha ne’ebé na’in 60 komposta husi feto na’in 18 no mane na’in 42 simu ona primeira doze, enkuantu na’in tolu seluk, feto ida no mane na’in rua kompleta ona vasina ba segunda doze.
Relasiona ho persentajen vasinasaun iha munisípiu Manatuto, Kordenadóra-Jerál asuntu COVID-19, Odete da Silva Viegas, relata atualmente númeru vasina iha munisípiu ne’e atinji ona porsentu 44 ne’ebé hatudu progresu signifikativu no tenki atinji porsentu 85, nune’e bele livre husi virus mortál ne’e, maibé nafatin kumpri distansiamentu sosiál no uza máskara, tanba virus ho variente foun ho naran Delta da’et lais liu no posibilidade ema ne’ebé simu ona vasina dala rua bele infetadu, maski ninia risku la grave.
Odete Viegas husu ba komunidade atu koopera ho parte saúde hodi simu vasina, nune’e bele hadook an husi virus mortál ne’e no kontribui ba redusaun númeru kazu iha Timor-Leste.
Iha fatin hanesan, Administradór postu administrativu Laclo, Samuel Rodrigues Pereira hatete, nia parte halo ona sensibilizasaun liuhosi meius door to door ka tama uma sai uma no halo mós kampaña iha sentru saúde Laclo rasik hodi enkoraja populasaun atu simu vasina.
Samuel Rodrigues Pereira reafirma, iha aldeia Labubu seidauk rejista komunidade ne’ebé infetadu ho COVID-19, maibé nafatin apela ba komunidade atu hakbesik an ba sentru saúde hodi simu vasina, nune’e bele salva an no família husi moras kontajioza ne’e.
Atividade kampaña ne’e, partisipa husi Komandante PNTL munisípiu Manatuto, Diretór DNDI, Diretór Nasionál Orsamentu no Jestaun Finansas Ministériu Saúde, Diretór Servisu Saúde Munisípiu Manatuto, Xefe Postu Saúde Laclo, reprezentante veteranu, líder komunitáriu no populasaun aldeia Labubu.
