Governu Timor-Leste

Komunidade Laclubar iha entuziasmu aas tebes hodi simu vasina bainhira Ministru ba Asuntus Parlamentares no Komunikasaun Sosiál (MAPKOMS), Fransisco Martins da Costa Pereira Jerónimo, sesta-feira ne’e, loron 27 fulan-agostu tinan 2021, hala’o Kampaña Nasionál Vasinasaun Kontra Covid-19 iha sede suku Batara, postu-administrativu Laclubar, munisípiu Manatuto hodi motiva liu tan pastisipasaun komunidade sira atu simu vasina.

Iha diskursu  MAPKOMS, “hato’o agradesimentu ba entidade frontline sira, liuliu parte saúde, seguransa, autoridade munisipál to’o iha nivel suku no aldeia ne’ebé seRvisu maka’as tebes durante ne’e, liuliu ohin bele mobiliza komunidade sira bele partisipa másima iha programa refere atu bele simu vasina hodi bele hasa’e imudade komunitária nian”.

“Moras ne’e afeta mundialmente, nasaun barak avansadu mós preokupa tebes, tanba ne’e inimigu ne’ebé invizível, katak ita la haree ho matan, maski nasaun jigante barak iha rekursu kompletu, maibé la konsege salva sira nia populasaun, no ikus ne’e mosu tan variante foun naran Delta, ne’ebé halo ema mate sura oras de’it, ho nune’e maka parte governu hahú limita sirkulasaun komunidade sira nian liu husi lockodown, atu bele fó tempu ba pesoál liña frente sira atu bele hala’o sira nia kna’ar hodi halo mitigasaun, hanesan parte mídia, polísia no militár, liuliu pesoál saúde rasik”.

“Hahú ohin lockdown totál iha Dili, tanba situasaun agora grave tebes, ita bele sai ba nesesidade urjénsia hanesan hola hahán, sosa aimoruk, no seluk tan, bainhira komunidade suku Batara mak vasina to’o ona porsentu 80 ne’e ita bele garante, tanba iha ona imunidade komunitária, agora daudaun Manatuto atinji ona porsentu 42, husu atu aumenta nafatin, labele ta’uk atu simu vasina, tanba nia mak dalan úniku ba prevensaun covid-19, governu mós hanoin hela atu prepara vasina ho tipu Pfizer hodi asegura ita nia oan sira husi tinan 12 to’o 18”, informa Ministru MAPKOMS.

Iha fatin hanesan Administradór Postu Admnistrativu Laclubar, Natalino Martins de Carvalho nu’udar uma nain, sente orgullu tanba marka istória foun ida iha postu refere ho vizita ministru nian no konsidera hanesan tempu osan mean tanba ministru bele hakat direta  to’o iha nia postu hodi bele ko’alia direta ho nia povu rasik.

“Reprezenta estrutura postu nian, tantu entidade públika no privada, hato’o agradese wain ba MAPKOMS,  tanba bele fó tempu hodi mai halo esklaresimentu ba dúvida  komunidade sira nian kona-ba asuntu Covid-19 inklui asuntu seluk ne’ebé sai problema báziku iha sira nia leet, komunidade lubuk ida mak afeta ba covid-19, ami trava hela tanba iha limitasaun ba rekursu transporte no fatin izolamentu, tanba ne’e, ha’u enkoraza komunidade sira atu bele partisipa ativa hodi simu vasina, hanesan ezemplu ne’ebé hatudu husi panfletu atravéz imajen ita nia lider nasionál sira ne’ebé simu ona vasina, konvida ita bo’ot sira bele aproveita tempu  ne’e atu bele husu pergunta relasiona ho asuntu covid-19 ba ita nia nain ulun sira”, dehan administradór postu Laclubar.

Iha sorin seluk, Diretór Nasionál Orsamentu no Jestaun Finansa Ministériu Saúde, Miguel Maria, reprezenta Diretora Jerál Prestasaun Saúde nian esplika katak, “programa vasina ne’e nia nain mak ita hotu, la’os parte saúde nian de’it, tanba asuntu saúde ne’e iha ema idak-idak nia liman, liuliu moras Covid-19 nu’udar problema mundiál ne’ebé afeta ba setór oioin, esforsu tomak halo ona, agradese tebes ho Manatuto nia progresu ne’ebé  signifikativu tebes, tanba númeru vasina aumenta, labele rona informasaun falsu no rumores sira ne’ebé infulénsia ba desizaun ne’ebé sala hodi fó perigu ba ita nia moris, iha nivel nasionál hasoru mós problema kona-ba fatin ba izolamentu ne’ebé hahú nakonu, pesoál saúde balu mós infetadu ba moras ne’e rasik”.

Iha biban nee,  xefe suku Batara, Tomas Pinto, relata katak, “suku refere iha populasaun hamutuk rihun rua, atus hitu, haat nulu resin haat (2.747) durante ne’e partisipa ativu iha programa vasina, bainhira rona informasaun husi parte saúde no lider suku sira, liuliu estudante Laclubar oan ne’ebé hala’o sira nia etudu iha universidade, fila ba postu hatudu ezemplu di’ak hodi simu vasina uluk hodi enkoraza mós inan-aman sira, maski iha parte seluk enfrenta problema kona-ba komunidade sira nia moris, tanba labele halo movimentu atu buka moris bainhira rona governu bandu labele halo viajen hodi sosa hahán no nesesidade sira seluk, tanba ne’e komunidade preukupa no ta’uk mate tanba hamlaha, la’ós covid de’it”.

Hatan ba preukupasaun ne’e, governante Mapkoms esplika katak, “komunidade barak sempre interpreta sala kona-ba regra estadu emerjénsia, serka sanitária inklui konfinamentu obrigatóriu, la’ós atu bandu ema labele halo buat hotu, iha limitasaun ba direitu balu ne’ebé la’ós importante atu halo, nesesidade bázika importante hanesan ba sosa aihan, sosa aimoruk, ba ospitál, asuntu judisiál, ne’e bele, importante mak tenke vasina hodi lori kartaun kinur atu justifika katak ita bo’ot sira iha ona imunidade komunitária atu asegura viajen hodi bele prevene moras ne’e da’et tutan ba ema seluk, tanba ne’e presija vasina”.

Ezekutivu MAPKOMS  ofisialmente Lansa simbolikamente no atribui  kartaun vasina ba reprezentante komunidade ne’ebé simu ona vasina iha doze dahuluk inklui mós doze daruak nian hodi ofisializa programa refere, nune’e bele enkoraja liu tan partisipasaun populasaun sira bele simu vasina.

Atividade lansamentu ne’e, hetan partisipasaun husi Administradór Postu Administrativu Laclubar, Diretór DNDI, Diretór Nasionál Orsamentu no Jestaun Finansa Ministériu Saúde, Diretór Servisu Saúde munisípiu Manatuto, Xefe Postu Saúde Laclubar, Komandante PNTL munisípiu Manatuto, reprezentante veteranus, autoridade komunitária inklui komunidade sira.