Alterasaun Daruak ba Suplementu Remuneratóriu ba Profisionál Liña Frente Sira Hetan Ona Promulgasaun
Prezidente Repúblika, Francisco Guterres Lú Olo, ohin promulga ona alterasaun daruak ba Dekretu-Lei n.u 17/2020, loron 30 fulan-abríl, ne’ebé kria ona suplementu remuneratóriu ba funsionáriu, ajente no traballadór sira administrasaun públika nian ne’ebé hala’o atividade profisionál sira iha servisu ba prevensaun ka kontrolu COVID-19, ka iha kondisaun sira ne’ebé hasoru direta virus SARS-CoV-2.
Iha alterasaun ida-ne’e, revee lista kona-ba kategoria traballadór benefisiáriu sira-nian, haree ba traballadór lubun boot ne’ebé hala’o sira-nia atividade ho kondisaun sira ne’ebé hasoru direta ba virus SARS-CoV-2 ohin loron ninia ámbitu luan liu fali ida ne’ebé prevee ona iha Dekretu-Lei anteriór, hanesan inkluzaun tékniku sira ne’ebé envolve iha programa vasinasaun kontra COVID-19, guarda prizionál no koveiru sira, entre sira seluk, ne’ebé seidauk abranje to’o ohin loron.
Valór husi suplementu remuneratóriu ida-ne’e, sei finansia husi Fundu COVID-19 nian, varia hosi dolár amerikanu 5 to’o 25 ba loron ida, tuir grau funsaun risku nian ne’ebé funsionáriu sira hasoru.
Alterasaun sira ne’e prevee iha diploma ida-ne’e ne’ebé prodús efeitu hahú husi loron 30 fulan-abríl tinan 2020, loron ne’ebé alterasaun ba Dekretu-Lei ne’e hahú vigora.
Direitu ba suplementu sira ne’e sei prolonga to’o loron 31 fulan-dezembru tinan 2021, sein prejuízu ba posibilidade estensaun tuirmai liuhusi intervensaun lejizlativa foun.
Projetu Dekretu-Lei ida-ne’e aprova ona iha sorumutuk Konsellu Ministrus nian, iha loron 4 fulan-agostu tinan 2021.
