MAPCOMS prezide sorumutuk dahuluk Konsellu Konsultivu
Ministériu ba Asuntus Parlamentares no Komunikasaun Sosiál, organiza sorumutuk dahuluk Konsellu Konsultivu nian ne’ebé prezide hosi Ministru Francisco Martins da Costa Pereira Jerónimo, hodi halo konsulta kona-ba asuntu sira jestaun nian no fó orientasaun ba servisu ka organizmu sira ne’ebé integra iha MAPKOMS, sorumutuk ne’e hala’o iha salaun sosiedade sivíl, Palásiu Governu, Dili, iha loron 17 agostu 2021.
Ministru Francisco Martins da Costa Pereira Jerónimo, hateten, objetivu hosi sorumutuk Konsellu Konsultivu nian ne’e, atu halo análize periódikamente ba rezultadu hosi implementasaun programa no atividade sira ne’ebé ministériu alkansa tiha ona durante ne’e no propoin medida alternativa sira atu hadi’a servisu sira.
“Órgaun kolejiál ida ne’e, hanesan mós órgaun konsulta ida, atu ajuda fornese informasaun mai Ministru no Sekretáriu Estadu relasiona ho funsionamentu ministériu nian, nune’e bainhira ami atu relata kona-ba lala’ok servisu ministériu nian ba Primeiru-Ministru, ami iha ona informasaun ida loloos”, hateten Ministru Francisco Martins da Costa Pereira Jerónimo.
Ezekutivu ne’e mós fó orientasaun ba membru konsellu konsultivu sira hotu, atu konsentra iha diskusaun sira relasiona ho ezekusaun programa, sub-programa no atividade ministériu nian ne’ebé rejistu iha Sistema Dalan Ba Futuru, atu nune’e bele iha rezultadu ne’ebé di’ak.
Iha sorumutuk dahuluk konsellu konsultivu ministériu nian ne’e, aprezenta mós persentajen ezekusaun orsamentu no rezultadu atinjidu sira hosi kada divizaun, ne’ebé aprezenta hosi Diretór Diresaun Nasional Administrasaun no Finansas no Kordenadór Unidade Planeamentu.
Ajenda ikus liu hosi Sorumutuk Konsellu Konsultivu nian ne’e mak, aprezenta kona-ba tetu orsamentu ne’ebé Ministériu ba Asunstus Parlamentares simu ba tinan fiskál 2022 nian no atribuisaun ba kada divizaun tuir programa prioridade ne’ebé ministériu nian iha tinan 2022.
Membru Konsellu Konsultivu sira ne’ebé Partisipa iha sorumutuk ne’e, Diretór Jerál, Inspetór Gabinete Inspesaun, Xefe Gabinete MAPKOMS no SEKOMS, Diretór Nasionál no Kordenadór sira.
