Ministru PKM simu vizita kortezia husi Enkarregadu Negósius foun Embaixada Amérika nian
Ministru Prezidénsia Konsellu Ministrus, Fidelis Manuel Leite Magalhães, simu vizita kortezia ida husi Enkarregadu Negósius foun Embaixada Estadus Unidus Amérika nian iha Timor-Leste, Thomas Daley, iha loron 19 fulan-agostu, iha Palásiu Governu, iha Dili.
Iha sorumutuk dahuluk ida-ne’e, husi kedas nia to’o iha país, iha fulan-jullu, diplomata ne’e hatudu ona ninia haksolok tanba iha Timor-Leste no nia afirma ona ninia disponibilidade tomak hodi rona prioridade sira Governu nian no hodi apoia saida maka presiza.
Ukun-na’in ne’e fó boazvindas ba Enkarregadu Negósius ne’e no ko’alia ona kona-ba projetu kooperasaun prinsipál sira ho Estadus Unidus, liuliu projetu reabilitasaun Aeródromu Baukau, projetu sira iha área turizmu nian no programa kompaktu ho Millennium Challenge Corporation (MCC).
Kona-ba kooperasaun ho MCC, Ministru Fidelis Magalhães halo ona rezumu ida kona-ba vizita ne’ebé foin akontese husi ekipa téknika organizasaun amerikana ida-ne’e nian no aprezenta ona progresu sira iha preparasaun ba estudu sira ne’ebé presiza ba implementasaun projetu sira ne’ebé sei dezenvolve tuir akordu ida-ne’e. Programa ne’e prevee atividade sira iha área edukasaun no hadi’ak infraestrutura sira bee no saneamentu no mós drenajen nian.
Durante sorumutuk ne’e, Ministru no Enkarregadu Negósius ko’alia mós kona-ba empeñu Timor-Leste nian atu halibur esforsu sira-hotu ne’ebé presiza hodi prevene no kombate tráfiku umanu. Hodi hatete katak foin promulga dekretu ne’ebé kria Komisaun Luta kontra Tráfiku Umanu. Harii komisaun ida-ne’e sei garante ezisténsia asaun koordenada ida entre interveniente oioin iha luta kontra tráfiku umanu, atu nune’e define polítika no estratéjia sira ne’ebé nesesária ba prevensaun no luta ida-ne’ebé efikás kontra tráfiku umanu.
Diplomata ne’e afirma ona katak iha tempu badak sei haruka lote vasina kontra COVID-19 ida ne’ebé oferese husi Estadus Unidus Amérika.
