Governu Timor-Leste

Governu Timor-Leste ho apoiu husi Misaun Rezidente Banku Dezenvolvimentu Aziátiku (ADB, sigla Inglés) iha Timor-Leste, realiza Vizita Grupu Konsellu Diretoria ADB mai Timor-Leste liuhusi plataforma virtuál.

Vizita ba Dahuluk husi Diretór Ezekutivu no Diretór Ezekutivu Suplente, Konsellu Diretoria hamutuk tolu-nulu-resin-lima ne’e, nia objetivu mak atu hatene di’ak liután kona-ba kondisaun atuál iha Timor-Leste nomós atu hatene di’ak liután kona-ba oportunidades no dezafius ne’ebé mak Banku enfrenta hodi apoiu Timor-Leste ninia esforsu dezenvolvimentu, objetivu no ambisaun sira.

Vizita Altu-Nivel ida-ne’e hanesan oportunidade ida ba membrus Konsellu Diretoria atu espresa sira nia kompromisu no interese hodi serbisu hamutuk ho Governu Timor-Leste no atu fó komentáriu kona-ba aspeitu dezenvolvimentu ne’ebé mak tama iha ADB nia área ba Timor-Leste.

Vizita ne’e mós hanesan momentu ida ne’ebé úniku ba membrus Governu relevante atu diskute no husu rekomedasaun husi Banku nomós atu hametin liután sira-nia relasaun ho ADB atu apoiu Timor-Leste alkanse ninia Objetivus Dezenvolvimentu, Ajenda 2030 ba Dezenvolvimentu Sustentavel, ida ne’ebé mak ADB mós aliña ona liuhusi ninia Estratéjia 2030.

Iha ninia Diskursu Abertura, Primeiru-Ministru, Jenerál Taur Matan Ruak hateten, “Vizita ba dahuluk husi Konsellu Diretoria, Banku Dezenvolvimentu Aziátiku mai ami-nia país, marka inísiu ba períodu esperansa no oportunidade foun ida. Momentu ida ne’ebé koinside ho transferénsia interna ami-nia país iha ADB nia laran, husi Rejiaun Pasífiku ba iha Diresaun Rejionál Sudeste Aziátiku nian. Transferénsia ida ne’ebé ami-nia Governu hein hakarak tebtebes no ne’ebé renova apoiu kontínuu husi país membru ADB nian ba ami-nia kandidatura hanesan Estadu Membru ho direitu tomak iha Asosiasaun País Sudeste Aziátiku nian (ASEAN). Ami agradese tebes ba apoiu hotu ne’ebé fó ona husi ita-boot sira nia Banku, to’o agora.”

Vizita loron-rua ne’e envolve diskusaun polítika no tékniku lubun ida. Espesifikamente, iha nivel Ezekutivu, Grupu Konsellu Diretoria mós hasoru malu ho Ministru Finansas, Rui Augusto Gomes ne’ebé mós hanesan Governadór reprezenta Timor-Leste iha ADB, no Vise-Ministra Finansas, Sara Lobo Brites, Governadora Suplente reprezenta Timor-Leste iha ADB, Ministra Negósius Estranjeirus no Kooperasaun, Adaljiza Magno, Ministru Obras Públikas, Salvador Pires no Ministru Agrikultura no Peskas, Pedro dos Reis, reprezentante sira husi ajénsia Autónomu, Parseirus Dezenvolvimentu nomós Setór Privadu.

“ADB dezempeña ona papel importante iha dezenvolvimentu nasaun ida-ne’e desde inisiu. Husi ami-nia Nasaun ne’e moris, Restaurasaun Independénsia tinan sanulu-resin-sai liubá, no durante trajetória dezenvolvimentu, servisus no esperiénsia parseria hirak ne’e importante tebes ba Nasaun ida ne’ebé mak hamriik filafali husi destruisaun no sofrementu ne’ebé naruk, tantu iha forma fahe koñesimentu no esperiénsia, dezenvolve infraestrutura, fornese rekursu finanseira no transfere teknolojia sira hodi apoiu alkanse Objetivus Dezenvolvimentu Sustentável – ajuda harii sosiedade ida ne’ebé mak inkluzivu no reziliente liután. Ha’u hakarak hato’o agradesimentu ho sinseridade ba Ita-Boot sira nia apoiu kontínuu ba ami-nia prosesu dezenvolvimentu no ajuda ona ami hasoru dezafius ne’ebé mak país ne’e enfrenta. Timor-Leste apresia tebes iha ADB hanesan parseiru konfiavel no hamutuk Ita hakat ba oin ultrapasa dezafiu sira,” dehan Governadór ADB husi Timor-Leste, Rui Augusto Gomes.