Primeiru-Ministru orienta ona Inspetór Jeral Estadu atu halo auditoria ba vasina ne’ebé hetan estragus iha HNGV
Primeiru-Ministru, Taur Matan Ruak, hafoin hetan informasaun kona-ba vasina ne’ebé hetan estragus iha Óspital Nasionál Guido Valadares (ONGV) iha loron 5 fulan agostu ne’e, orienta kedas ba Inspetór Jeral Estadu atu inísia prosesu auditoria ba asuntu refere, atu buka hatene kona-ba kauza husi problema ne’e.
Tuir informasaun preliminaria ne’ebé iha katak, iha loron 10 to’o 15 fulan juñu liubá, akontese instabilidade enerjia elétrika iha ONGV hodi prejudika ba sistema refrijerasaun armazenamentu vasina AstraZeneca nian ne’ebé mak provoka irregularidades iha temperatura refrijeradór hodi hetan prejuízu sira ne'e.
Tanba ne’e tuir konkluzaun no rekomendasaun hosi Konsellu Tékniku Nasionál Imunizasaun Timor-Leste (NITAG-TL- sigla portugés) hamutuk ho OMS, konklui katak ema sira ne’ebé simu vasina hosi loron 10 to’o 15 fulan juñu espesífiku iha ONGV konsideradu nulo/inválidu, nune’e rekomenda tebes atu simu filafali vasinasaun foun.
Xefe Governu lamenta tebes ho insidente ne’e, no husu deskulpa ba profisionais saúde no utente sira ne’ebé simu ona vasina iha loron 10 to’o 15 fulan juñu iha ONGV, no orienta ona ba Ministériu Saúde atu kuidadu liután iha jestaun, nune’e iha tempu sira oin mai akontesimentu sira hanesan ne’e labele akontese filafali.
