Timor-Leste simu vasina AZ doze rihun 300 hosi Governu Austrália
Primeiru-Ministru, Taur Matan Ruak, lori Governu Timor-Leste nia naran, simu vasina AstraZeneca doze rihun 300 doasaun hosi Governu Austrália ne’ebé mak entrega simbolikamente hosi Embaixadór Peter Roberts liuhosi serimónia handover ne’ebé mak hala’o iha Edifísiu SAMES, Kampu Alor Dili, kuarta ne’e.
Iha diskursu, Xefe Governu sente kontente tanba foin ba dahuluk Timor-Leste Leste simu doze ho númeru boot, hafoin hato'o pedidu ofisiál ida ba nia ómologu Australianu, Scott Morrison iha fulan abril liu ba, nune’e aproveita biban refere, Xefe Ezekutivu hodi Estadu no povu Timor-Leste tomak nia naran, agradese tebes ba Governu Kanberra, espesiál ba nia ómologu, Scott Morrison no Embaixador Peter Roberts ba doasaun refere.
“Ohin primeira vez ita hetan 300 mil dala ida de’it, ida ne’e só posivel ba ita nia país amigu sira, doadór sira iha ne’e halo esforsu fó kontribuisaun para ajuda ita atinje ita-nia meta ida ne’e, tanba ne’e lori ha’u naran rasik lori VIII Governu Konstitusionál nia naran lori Estadu no povu Timor tomak hakarak hato’o agradesimentu espesiál ba Governu Austrália liuliu ha’u nia amigu Señór Primeiru-Ministru Scott Morrison no Embaixadór [Peter Roberts] ba serbisu di’ak. Ha’u hatene Austrália garantia ba Timor 1.5 milloins ate tinan ne’e remata i posivel kontinua fó nafatin ho kontribuisaun país sira seluk husi Sistema COVAX, Portugal, Japaun, Nova Zelándia no país sira seluk ne’ebé laran kmaan kontinua fó ba Timor bele ajuda minimiza risku iha vida populasaun Timor-Leste ninian” , dehan Xefe Governu iha nia diskursu.
La haluha Xefe Governu agradese mós ba reprezenta Organizasaun Mundial Saúde (OMS) ba apoiu Timor-Leste no mundu iha situasaun difisil ne’e, inklui Komisaun Interministeriál ne’ebé lidera hosi Vise Primeira Ministra ba esforsu halo sensibilizasaun iha teritóriu tomak hodi sensibiliza no konsiensializa sidadaun sira ba importánsia vasina no kontra informasaun falsa sira.
Xefe Governu mós agradese ba esforsu hosi Instituisaun hotu- ne’ebé kolabora no kontribui ona durante tempu difisil iha mitigasaun no luta kontra COVID-19.
Vasina ne'e, Governu sei administra atu hasa'e kobertura ba kampaña nasionál imunizasaun ba populasaun sira iha Munisípiu sira fronteira nian (Kovalima, Bobonaro no Oekusi-Ambenu) inklui Munisípiu Ermera ne’ebé atualmente númeru kazu pozitivu COVID-19 as tebes iha teritóriu laran, ne’ebé kobertura vasina nia persentajen sei ki’ik liu entre Munisípiu 11 no RAEOA.
Partisipa iha Serimónia ne’e mak hanesan Vise-Primeira-Ministra, Armanda Berta dos Santos, Ministru Kordenadór Asuntus Ekonómiku, Joaquim Amaral, Ministru Asuntu Parlamentar no Komunikasaun Sosiál, Francisco Martins da Costa Pereira Jerónimo, Ministru Finansas, Rui Augusto Gomes, Ministra Negósiu Estranjeiru no Kooperasaun, Adaljiza Albertina Xavier Reis Magno, Ministra Saúde, Odete Maria Freitas Belo, Vise-Ministru Administrasaun Estatál, Lino de Jesus Torrezão, Enkaregadu Negósiu EUA nian, Reprezentante sira husi Ajénsia Espesializada Nasoins Unidas nian hanesan UNICEF no WHO.
