Lansamentu ba Programa Prémiu Nasionál Nutrisaun nian
Primeiru-Ministru, Taur Matan Ruak, iha segunda-feira, loron 9 fulan-agostu tinan 2021, iha Dili, lansa ona, iha Dili, Programa Prémiu Nasionál Nutrisaun nian, hodi alkansa objetivu nasionál boot hodi Halakon Hamlaha no Subnutrisaun, ne’ebé prevee ona iha Planu Estratéjiku Dezenvolvimentu Nasionál (PNDS) no iha kompromisu sira ne’ebé País asume ona ba Objetivu Dezenvolvimentu Sustentavel (ODS) nian sira.
Programa Prémiu Nasionál Nutrisaun nian ne’e sei implementa husi Sekretariadu Nasionál SUN Movement Nasoins Unidas nian, iha kolaborasaun ho Membru sira Komisaun Interministeriál Seguransa Alimentár nian (KONSSANTIL), ho tutela husi Ministru Agrikultura no Peskas nian.
Prémiu Nasionál ida-ne’e hetan apoiu finanseiru dolar amerikanu rihun atus ida, husi Programa Alimentár Mundiál (PAM) no hetan mós apoiu tékniku husi Parseiru Dezenvolvimentu nian sira, nasionál no internasionál, liuliu husi Fundu Nasoins Unidas ba Infánsia (UNICEF) no husi Departamentu Asuntus Esternus Austrália nian (DFAT).
Programa ida-ne’e hanesan kontinuasaun husi Prémiu Prezidensiál Nutrisaun nian, ne’ebé implementa durante mandatu Taur Matan Ruak nian iha Prezidénsia Repúblika, husi tinan 2014 to’o 2017.
Primeiru-Ministru, iha ninia diskursu, manifesta ona “satisfasaun boot” iha relansamentu Programa ida-ne’e nian “ne’ebé hakarak sai hanesan fonte inspirasaun, enkorajamentu no estímulu ba Sidadania no Komunidade Alimentár sira ne’ebé informada, ativa, partisipativa no organizadu liu, ho destake ba papel Autoridade Lokál sira nian, no mós ba nesesidade atu envolve Juventude, no ba devér inkluzaun nian grupu Femininu no grupu Portadór Inkapasidade nian sira.
Xefe Governu ne’e afirma ona katak Prémiu Nasionál Nutrisaun nian ne’e ho objetivu “atu promove inovasaun, kriatividade no empriendedorizmu, hodi envolve parseiru dezenvolvimentu hotu-hotu iha implementasaun ba planu no medida oioin atu kombate hamlaha no subnutrisaun, liuliu tékniku, peritu, espesialista ka estudiozu sira, ba nesesidade hodi debate, iha Diálogu Nasionál, kona-ba “alimentasaun saudavel no amiga do ambiente” iha espíritu Komunidade Alimentár ida ne’ebé loos.
Xefe Governu hatutan tan katak debate ida-ne’e “sei kontribui ho loloos atu hadi’a ita-nia prosesu produsaun, distribuisaun no armazenamentu sira ai-han nian, hodi promove kurva dekrexente husi taxa subnutrisaun nasionál, ne’ebé iha tinan 2010 afeta populasaun 58% no iha tinan 2020 sei afeta ita-nia sidadaun 48%, liuliu sira ne’ebé presiza liu [karensiadu], vulneravel no dezfavoresidu liu.
