Governu Timor-Leste

Covalima, 05 agostu 2021, (DNDI)-Ministru ba Asuntus Parlamentares no Komunikasaun Sosiál (MAPKOMS), Fransisco Martins da Costa Pereira Jerónimo, inaugura Sentru Informasaun no aumezmu tempu lansa mós ba programa Naroman ba Suku ho Tema Governu iha Povu iha suku Dato-Tolu, postu-administrativu Fohorem, munisípiu Covalima.

Objetivu husi programa ida ne’e atu rona diretamente povu nia preokupasaun no fó motivasaun ba ita nia komunidade sira, liuliu ba sira ne’ebé mak iha áreas rurais.

Iha intervensaun Ministru MAPCOMS nian katak: “Polítika VIII governu nian iha planu lubuk ida ne’ebé  mak ita hala’o,  meius ida mak oinsá ita atu lori governu ba iha povu nia le’et. Programa Naroman ba Suku ida ne’e hanesan meius ida atu ita bele iha koñesimentu no fó naroman ba ita nia kakutak, oinsá bele hatene kona-ba média sosiál no komunikasaun, hodi esklarese loloos saida mak governu nia programa no saida mak povu nia hakarak iha baze”.

Iha fatin hanesan, xefe suku Dato Tolu, João Agostinho Resi, agradese ba programa MAPKOMS nian ne’ebé maka hala’o, tanba durante tinan 20 nia laran ona, suku Dato Tolu la iha koñesimentu ba área komunikasaun nian, inklui mós la asesa ba estrada. Autoridade lokál ne’e husu ba ministru MAPKOMS atu kuidadu no tau matan nafatin ba programa ne’ebé maka governu hala’o hela iha suku refere tanba suku refere durante ne’e iha hela nakukun nia laran, maibé agora sai naroman ona.

Iha sorin seluk, ajduntu administradór munisípiu Covalima,  Afonso Nogueira Nahak, agradese tebes ba atividade refere, tanba pela primeira vés iha suku ne’ebé extremamente iha remotas, bele hetan sentru informasaun no halo mós inaugurasaun husi ministru MAPKOMS, atravéz programa Naroman ba Suku. Tanba ne’e, hodi  povu Covalima nia naran hato’o agradesementu ba ministru husi apoiu ne’e hodi estabelese Sentru Informasaun ida ne’e iha suku Dato Tolu, iha postu admistrativu Fohorem, munisípiu Covalima.

Governante MAPKOMS  reforsa tan katak: “Ho onra  bo’ot  tebes, tanba suku Dato Tolu oferese ba iha ministériu hodi hakat mai iha suku refere, eventu ida ne’e atu kompleta mehi ne’ebé ema hotu nian liu husi VIII Governu Konstitusionál ne’ebá maka ita nia S.E primeiru ministru, Taur Matan-Ruak,  wainhira nia sai primeiru ministru, iha programa lubun bo’ot ida ne’bé maka nia atu hala’o”.

“Programa ida ne’e halo oinsá maka lori governu ba iha komunidade nia leet no atu rona povu ka komunidade nia liafuan ka povu sira nia halerik wainhira nai ulun sira la mai iha komunidade nia leet, nain ulun sira la hatene saida mak povu sira nia susar no mós komunidade sira hakarak hato’o ka aprezenta ba iha nai ulun sira kona«ba komunidade sira nia hakarak. Hodi ida ne’e programa Naroman ba Suku iha Suku Dato Tolu bele motiva ita nia komunidade sira iha áreia rurais”, tenik MAPKOMS.

Iha intervensaun ikus,  ministru apela ba autoridade munisipál nian, hanesan xefe suku, administradór, komandante no mós ba komunidade hotu-hotu katak, programa Naroman ba Suku ne’e hanesan buat kiik ida hodi halo ba iha Suku Dato Tolu. Buat simples ne’e tau hamutuk sei sai bo’ot. Maski kiik no laiha folin, maibé neneik sei sai folin bo’ot. Durante VIII governu nia mandatu, sei halo asisténsia nafatin hodi sai bo’ot, asisténsia la’ós maka ohin de’it,  iha tinan tuir mai ita sei halo nafatin atu nune’e bele sai bo’ot tan hodi bele dezenvolve an ba ema hotu.

“Liafuan Naroman ba Suku ne’e, ema hotu hanoin dehan, ne’e sei hetan eletrisidade, maibé programa ne’e iha área ami nian hateten katak, informasaun ba iha suku hodi hetan koñesimentu ba iha suku, hodi suku ida ne’e bele koñese no hodi fó naroman ba ita nia kakutak. Hodi koñese kona-ba média sosiál no komunikasaun. Ho nune’e, esklarese loloos saida mak governu nia programa, no saida mak povu nia hakarak”, konklui MAPKOMS.

Partisipa iha serimónia ne’e, ministru MAPCOMS, autoridades lokais munisípiu Covalima no xefe gabinete SECOOP, veteranus no komunidade sira.