Governu Timor-Leste

Organizasaun Mundial Komérsiu (OMK) nu’udar organizasaun internasional únika ne’ebe regula atividade komérsiu internasional nian. Organizasaun ne’e harí iha tinan 1995 no prezensa OMK ho nia objetivu bazeia ba akordu hodi fo auxilia ba produtores sasan, exportadores no importadores husi kada nasaun hodi desempeña sira nia atividade komérsiu tuir regras internasional nian hodi garante seguru no transparencia.

Ba Timor-Leste nia esforsu hodi adere ba OMK inisia kedas iha loron 7 Dezembru 2006 liuhusi kriasaun Grupu Traballu. Depois tinan 14 kriasaun Grupu Traballu hodi prepara dokumentus nesesariu sira haktuir husi regras OMK nian, maka, iha loron 1 Outubru 2020, Timor-Leste realiza enkontru Grupu Traballu Dahuluk ho pais membrus OMK sira hodi diskute ho klean kona-ba seriedade Timor Leste nia proposta kona-ba adezaun atu sai membrus ba OMK.

Ho ninia prinsípiu loke espasu fronteiras teritoriais hodi fornese garantias bazeia ba “Most-Favored-Nation Principle-MFN, hodi lahamosu tratamentu naun diskriminatóriu entre países membrus sira ho kompromisu transparênsia husi atividades hotu, fo esperansa ba komitmentu Governu Timor Leste hodi bele konvense pais membrus OMK sira kona-ba Timor-Leste nian desezu forte iha prosesu nee. Kumprimisu nee realiza liuhusi Reuniaun Grupu Traballu Daruak (Second Working party Meeting-SWPM) loron 29 Jullu 2021, modera husi Embaixador Portugal, Rui Macieira, ne’ebe sai mos Prezidente Grupu Traballu Timor-Leste nian.

Delegasaun Timor-Leste lidera husi Xefe Negosiador Adezaun Timor Leste ba OMK, atual Ministru Koordenadór Asuntus Ekonómikus, Eng. Joaquim Amaral konsidera katak reuniaun nee nu’udar reuniaun ofisial hodi responde ba demanda husi pais membrus sira konaba Timor-Leste nia pontualidade hodi prepara dokumentus nesesariu sira haktuir husi konkordansia entre Sekretariadu OMK iha Jenebra ho Governu Timor Leste hamutuk ho pais membrus OMK sira.

Reuniaun Grupu Traballu Daruak hatudu sinal pozitivu ba pozisaun Timor Leste nian ne’ebe hato’o husi pais membrus OMK sira konaba vontade Timor Leste hodi adere ba OMK. Husi kontinente Europea, liuhusi reprezentante Uniaun Europea elojia no apresia tebes ba esforsu Governu Timor Leste nian iha faze preparasaun no elaborasaun dokumentus nesesariu sira haktuir husi regras OMK nian. Nunee mos husi kontinente Amérika liuhusi reprezentante Estados Unidos Amerika (EUA) hato’o mos apresiasaun ba esforsu hirak nee hodi suporta vontade Timor Leste sai membru OMK. Husi kontinente Asia, pais sira hanesan Xina, Indonezia no Korea do Sul fo sira nia apoiu tomak ba esperansa no komitmentu Timor-Leste nian atu sai membru OMK. Iha parte seluk, Australia hodi salienta sira nia komprimisu atu kuntinua deklara ho totalmente kumpremetidu apoiu Timor Leste nia setor ekonomia desde pais nee hetan ninia independensia hodi bele sai membru OMK no hato’o mos solidariedade ba dezastre ne’ebe akontese iha tinan 2020. Pais Nova Zelándia hatoo mos sira nia apoiu másimu ba esforsu Timor Leste hodi sai membru OMK. Ikus liu, reprejentante nasaun husi g7+ nian hato’o apoiu total ba Timor-Leste nia adezaun ba OMK.

Komitmentu husi pais membrus OMK hirak nee kuntinua fo hanoin nafatin ba Timor Leste konaba afrimasaun hodi loke espasu ba merkadu nasionais husi komérsiu internasional ho ezesoens apropriadas ho nia flexibilidade adequada hodi konsidera nu’udar asistênsia dezenvolvimentu sustentável konaba redusaun pobreza hodi harí paz no estabilidade.

Iha sorin seluk,pais membrus OMK sira kuntinua husu ba Timor Leste konaba asesu merkadu livre tenke hetan akompanamentu ho polítikas nasionais ho lejislasaun aproriadu ne’ebe adequadas hodi kontribui ba dezenvolvimentu ekonômiku haktuir husi nesesidades no aspirasoens país membru sira tuir regras OMK nian.

Iha sesaun abertura reuniaun Grupu Traballu Daruak, eis Presidenti Repubilka Timor Leste no Laureadu Nobel da Paz, Jose Ramos Horta afirma ho klaramente katak adezaun Timor Leste ba OMK nu’udar dalan únika ba Timor Leste hodi sai membrus ASEAN nu’udar prioridade nasional.

“Adezaun ba OMK importante tebes ba ami hanesan mos adezaun ba ASEAN liuhusi konsensu nasional hodi konsidera katak ida nee nu’udar prioridade nasional Timor Leste nian”.

Ikus mai pais membrus OMK sira kuntinua husu ba Governu Timor Leste hodi prienxe pedidu hirak ne’ebe mak hato’o husi pais membrus sira durante faze negosiasaun antes 31 agustu 2021 maka hanesan intesiva negosiasaun bilateral hodi proativa aprosima membrus pais sira hodi finaliza dokumentus negosisaun bilateral hirak ne’ebe seidauk kompleta.

Husu mos ba Governu Timor Leste atu hare kestoens konaba planu asaun lejislasaun nian antes hakat ba faze reuniaun tuir mai. Hodi nunee, pais membrus sira bele hatene konaba esforsu Timor leste nian iha prosesu hirak nee. Iha sorin seluk, pais membrus OMK husu mos ba Governu Timor Leste hodi bele fornese tabela apoiu agrikultura nian bazeia ba pedidu husi pais membru sira antes realizasaun enkontru tuir mai.

Hatan ba pedidu husi pais membrus OMK sira, Xefe Negosiador, Eng.Joaquim Amaral promote hodi kumpri requisitus propostos ne’ebe hato’o husi países membru sira.

“Faze negosiasaun nee hatudu inísiu ne’ebe diak konaba kompromisu Governu Timor-Leste nian hodi sai membru OMK. Ami sei konklui hotu leis relevantes hirak nee bazeia ba pedidu husi pais membru OMK sira ho mais rápidu no posível antes tama ba faze negosiasaun tuir mai ho pais membru OMK sira”

Dokumentus nesesariu sira ne’ebe presiza atu kompleta bazeia ba pedidu husi pais membrus OMK sira liuhusi Sekretariadu OMK iha Jenebra, elabora husi ekipa Grupu Traballu Timor Leste nian ne’ebe mai husi Timor oan rasik husi instituisaun estadu sira no mos ajensia autonoma hirak ne’ebe lidera husi Sekretariadu Adezaun Timor-Leste ba OMK husi MCAE.

Reuniaun Grupu Traballu Daruak ne’ebe fasilita husi Sekretariadu Adezaun Timor Leste ba OMK husi MCAE halao iha salaun enkontru Ministériu Negósius Estranjeirus no Kooperasaun no hetan partsipasaun másimu husi membrus Governu sira hanesan Ministru Koordenadór Asuntus Ekonómikus, Eng. Joaquim Amaral, Ministru Finansas, Rui Gomes, Ministru Turizmu, Komérsiu no Indústria, José Lucas do Carmo da Silva, Vise-Ministru Komérsiu no Indústria Domingos Lopes Antunes no Sekretáriu Estadu Formasaun Profisionál no Empregu, Alarico do Rosário. Partsipa mos iha reuniaun nee pesoal eminente balun hanesan eis Prezidente Republika Timor Leste, Jose Ramos Horta no eis Primeiru Ministru Timor Leste, Estanislau da Conceição Aleixo Maria da Silva.