Governu hala’o sorumutuk hodi analiza dezafiu sira no implementasaun husi programa sira ne’ebé daudaun ne’e la’o hela
Membru Governu Konstitusionál VIII hala’o sorumutuk iha auditóriu Ministériu Finansas, iha loron 6 fulan-agostu tinan 2021, hodi analiza no solusiona dezafiu sira ne’ebé identifika ona iha jestaun no resposta ba dezastre naturál sira no esklarese kestaun sira ne’ebé iha relasaun ho implementasaun subsídiu nian ba profisionál sira liña oin nian.
Durante enkontru ne’e, governante sira halo diagnóstiku ida kona-ba pontu situasaun ba projetu konstrusaun no projetu apoiu umanitáriu sira, hodi hatán ba impaktu husi inundasaun loron 4 fulan-abríl nian. Análize ida ne’e foka liu ba identifikasaun husi dezafiu prinsipál sira ne’ebé identifika ona durante prosesu implementasaun nian, atu bele halo diskusaun ba solusaun sira ne’ebé bele aplika hodi rezolve dezafiu sira ne’e no atu asegura koordenasaun ne’ebé presiza entre entidade Estadu oin-oin nian ne’ebé envolve iha projetu sira ne’e.
Aleinde rezolusaun ba problema sira ne’ebé deteta ona iha prosesu rekonstrusaun no iha apoiu emerjénsia ne’ebé la’o hela, diskusaun ne’e ninia objetivu mós atu garante redusaun ba risku husi katástrofe foun sira no garante resposta ida ne’ebé lais no efisiente ba dezastre naturál sira iha futuru.
Nesesidade atu hadi’a enkuadramentu legál, koordenasaun no dezenvolvimentu institusionál, kapasidade levantamentu dadus nian, hadi’a sistema sira ba avizu préviu nian, reforsa reziliénsia ba komunidade sira, prevensaun no redusaun ba fatór risku sira, no hakbiit preparasaun ba resposta emerjénsia, sai hanesan área no atividade prioritária sira ne’ebé halo ona diskusaun durante sorumutuk ne’e, ho objetivu atu hadi’a prevensaun, jestaun no resposta ba dezastre naturál sira.
Membru Governu sira mós hetan ona esplikasaun ba kestaun balu ne’ebé iha relasaun ho implementasaun subsídiu ba profisionál sira liña oin nian, ne’ebé hetan ona aprovasaun iha sorumutuk ikus Konsellu Ministrus nian.
Ikusliu, Governante sira analiza mós progresu implementasaun ba projetu prinsipál sira ne’ebé finansia husi Fundu COVID-19 no ninia taxa ezekusaun nian. Taxa ezekusaun husi Fundu COVID-19, to’o loron 27 fulan-jullu atinje ona 39%, inklui kompromisu no obrigasaun sira.
