Governu Timor-Leste

Bombeiros hanesan instituisaun Estadu nian ne’ebé hari, Iha fulan Novembru tinan 1999 ho naran Comissão de Apoio para a Transição de Timor-Leste (CATT) Comissão ne’é mós integra iha Missão Nacões Unidas nian United Nation Transitory Administration in East Timor (UNTAET), Iha fulan Novembru tinan 1999 nia laran sira halo rekrutamentu ba Timor oan sira iha Distritu tolu hanesan, Díli, Baucau no Aileu atu sai nudar Bombeiros Timor oan.

Iha tempu ukun aan Servisu Nasional Bombeiros hamrik iha tinan 2002, husi Governu Transitóriu (UNTAET) ne’ebé chefia husi Dr. Sérgio Vieira de Mello ho naran Fire Rescue and Emergency Services (Serviço de Incêndio, Salvamento e Emergência) ho objectivu atu ajuda Sidadaun hotu, liu-liu sira ne’ebé foin sai husi konflitu Polítiku 1999 ninian.

Missão Bombeiros nian mak atu fó garantia ba prestasaun nó seguransa ba sidadaun hotu nia vida no sira nia sasan. Hamate ahi ne’ebé han uma, ailaran ka floresta, Industria no fó mós assistensia ba asidentes rodoviarios no halo mós salvamentu iha areas rurais, sidade laran, industrias, no fó apoio ba komunidade ne’ebé hasoru desastres naturais.

Nune-mós ho Visaun atu prepara, no hadia rekursus humanos, ho formasaun espesializada ka formasaun kontinua ba Bombeiros sira atu nune,e sira bele iha kapasidade no Koñesimentu no halo gestaun ida ne’ebé diak hodi nuné bele hetan susesu ba servisu Bombeiros nian iha terrenu.

Tanba prespektivas Bombeiros nian maka hanesan hateke ba pasadu ne’ebé nakonu ho difikuldades no frakesas sira hanesan lisaun ida, hodi prepara aan diak liu tan atu hasoru futuru ne’ebé nakonu mos ho desafios oin-oin. Tan neé maka Bombeiros tenke preparadu teknikamente hó disiplina ne’ebé diak ho profisionalismu no usa mekanismu ne’ebé adekuadu iha atendimentu hotu hotu ba Sidadaun tomak iha Timor-Leste.