Ministériu Finansas Distribui Sirkulár Regras Elaborasaun Orsamentu no Envelope Fiskál Aprovadu OJE 2022
Iha Sesta-feira, loron 16, Fulan-Jullu, Tinan 2021, Ministériu Finansas ofisialmente distribui ona Sirkulár kona-ba Regras Elaborasaun Orsamentu no Distribuisaun Envelope Fiskál Aprovadu ba kada Instituisaun Estadu iha Perimetru Orsamentál OJE 2022.
Sesaun traballu ida-ne’e hanesan kontinuasaun ida husi Jornada Orsamentál ba OJE 2022 no Deliberasaun Konsellu Ministrus iha Kuarta-feira, 14 jullu 2021 kona-ba Pakote Fiskál Agregadu no Desagregadu tinan 2022.
Eventu ne'e organiza husi Diresaun Jerál Planeamentu no Orsamentu, Ministériu Finansas serbisu hamutuk ho Unidade Planeamentu, Monitorizasaun no Avaliasaun, Gabinete Primeiru-Ministru.
Eventu ne’e inklui ho entrega ofisiál Envelope Fiskál Aprovadu 2022 husi Vise-Ministra Finansas, Sara Lobo Brites ba reprezentante sira husi Gabinete Prezidénsia Repúblika, Parlamentu Nasionál, Tribunál Rekursu no Gabinete Primeiru-Ministru.
Iha 29 juñu 2021, Governu liuhosi Semináriu Nasionál Jornada Orsamental ba OJE 2022 ne’ebé prezide husi Primeiru-Ministru, Taur Matan Ruak, define ona área importante neen ne’ebé mak sai prioridades ba Governu atu investe iha tinan fiskál 2022. Área prioridades 6 ne’e mak hanesan: (i) Kapitál Sosiál (Edukasaun, Formasaun Profesionál no Saúde); (ii) Abitasaun no Inkluzaun Sosiál; (iii) Setór Produtivu (Agrikultura, Turizmu), Ambiente no Konektividade; (iv) Dezenvolvimentu Setór Privadu no Kooperativa; (v) Dezenvolvimentu Rurál; no (vi) Boa Governasaun.
Liuhusi Semináriu ne’e, Governu mós konkorda tetu orsamentu ba OJE 2022 ho montante billaun $1,5 hodi finansia setór prioridades 6 ho objetivu atu atinji dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.
