Governu Timor-Leste

Ohin, loron 20 fulan-jullu tinan 2021, hala’o serimónia entrega lote ida rihun 12 vasina AstraZeneca nian kontra COVID-19 ne’ebé oferese husi Portugál.

Iha serimónia ne’ebé maka hala’o iha Aeroportu Internasionál Prezidente Nicolau Lobato, Ministériu Negósius Estranjeirus no Kooperasaun, liuhusi ninia Sekretáriu-Jerál, Embaixadór Jorge Camões, ofisiálmente simu vasina kontra COVID-19 husi Embaixadór Portugál nian iha Dili, José Pedro Machado Vieira.

Ida-ne’e hanesan vasina lote dahuluk nian ne’ebé oferese husi Portugál, ne’ebé kompromete ona atu fó doze millaun tolu ba País Afrikanu sira ho Lian Ofisiál Portugés (PALOP-sigla iha lian portugés) no Timor-Leste. Portugál, nu’udar Estadu Membru Uniaun Europeia, ne’ebé mós kontribui ona ba mekanizmu COVAX nian, inisiativa globál liuhusi vasina doze 124.800 ne’ebé to’o ona iha país ne’e.

To’o agora Timor-Leste simu ona totál doze 363.580 husi AstraZeneca no doze rihun 100 husi Sinovac.

Iha territóriu nasionál tomak, ema ne’ebé simu ona vasina doze dahuluk nian hamutuk 250.644, (33,2% husi populasaun ho idade tinan 18 ba leten no sira ne’ebé kompleta ona vasinasaun hamutuk 56.627 (7,5%).

Iha Munisípiu Dili, doze dahuluk Vasina kontra COVID-19 ne’ebé mak administra ona ba ema hamutuk 121.841 (56,9%) no ema ne’ebé maka simu ona doze rua hamutuk 43.982 (20,5%).

Serimónia entrega ne’e hetan mós partisipasaun husi Reprezentante UNICEF nian iha Timor-Leste, Bilal Aurang Zeb Durrai.