Vise-Primeiru-Ministru vizita sede CPLP nian
Vise-Primeiru-Ministru, José Maria dos Reis, akompaña husi Ministra Negósius Estranjeirus no Kooperasaun, Adaljiza Magno, vizita sede Komunidade País Lian Portugés (CPLP - sigla ho lian portugés), iha Lisboa, iha ne’ebé Sekretáriu Ezekutivu CPLP nian, Francisco Ribeiro Telles, simu sira, iha loron 8 fulan-jullu tinan 2021.
Vizita ne’e hanesan parte husi preparasaun ba Konferénsia Xefe Estadu no Governu sira CPLP nian ba da-XIII, ne’ebé sei hala’o iha loron 17 fulan-jullu tinan 2021, iha Luanda, Angola, ho lema “Harii no Hametin Futuru ida Komún no Sustentavel”. Loron ida-ne’ebé hala’o Simeira ne’e monu ho loron ne’ebé CPLP komemora ninia aniversáriu ba da-25.
Durante Simeira ne’e iha Luanda, Zacarias Albano da Costa, eis Ministru Negósius Estranjeirus Timor-Leste nian sei substitui Francisco Ribeiro Telles, (husi Portugál) hanesan Sekretáriu Ezekutivu CPLP nian. Cabo Verde sei termina ofisiálmente ninia mandatu no Repúblika Angola sei asume prezidénsia rotativa CPLP nian.
Sorumutuk ne’e mós hetan partisipasaun husi Embaixadora Timor-Leste nian iha Portugál, Isabel Amaral Guterres no Reprezentante Permanente Timor-Leste nian ba CPLP, Marina Ribeiro Alkatiri.
