Governu Timor-Leste

Ohin, loron 14 fulan-jullu tinan 2021, Vasina AstraZeneca kontra COVID-19 hamutuk 52.850 to’o ona mai Timor-Leste, husi Austrália. Ida-ne’e hanesan remesa dahituk husi Austrália, nune’e númeru totál vasina kontra COVID-19 nian ne’ebé fó husi Austrália sa’e ba 227.580.

Aleinde vasina husi Austrália, vasina AstraZeneca doze 124.800 mós to’o iha paíz liuhusi mekanizmu COVAX nian no doze rihun 100 husi vasina Sinovac nian, ne’ebé oferese husi Xina, nune’e totál vasina kontra COVID-19 hamutuk doze 451.580.

Iha territóriu tomak, ema 237.946 (31,5% husi populasaun ho idade 18 ba leten simu ona vasina doze dahuluk no ema 42.942 (5,7%) maka kompleta ona vasinasaun.

Iha Munisípiu Dili, administra ona doze dahuluk vasina kontra COVID-19 nian ba ema 118.530 (55,4%) no ema 30.558 maka simu ona doze rua ne’e, porsentu (14,3%).

Ohin iha sorumutuk Konsellu Ministrus nian loron 14 fulan-jullu tinan 2021, aprova ona estratéjia foun ida kona-ba vasinasaun kontra COVID-19 ba munisípiu ida-idak, ne’ebé envolve mobilizasaun rekursus másimu ba vasinasaun iha munisípiu ida-idak, tuir kalendáriu ne’ebé define ona, hahú iha munisípiu sira ne’ebé ho risku boot, to’o atinje munisípiu hotu iha territóriu nasionál.

Hodi garante vasinasaun ba populasaun tomak, liuliu ba foin-sa’e sira ho idade entre tinan 12 to’o tinan 17, Konsellu Ministrus orienta ona Ministériu Saúde hodi hahú prosesu akizisaun vasina Pfizer nian no tau-hamutuk kondisaun no ekipamentu sira ne’ebé nesesáriu ba ninia armazenamentu no transporte.