Governu Timor-Leste

Primeiru-Ministru, Kay Rala Xanana Gusmão, ne’ebé akompania husi Sekretáriu Estadu Seguransa, Francisco Guterres, Sekretariu Estadu Agrikultura, Marcos da Cruz, Administradór distritu Viqueque, Francisco Guterres, Komisáriu PNTL, Longuinhos Monteiro, Embaixador Japão, Iwao Kitahara halo konsulta ba Planu Estratéjiku Dezenvolvimentu Nasionál (PEDN) iha Sub-Distritu Uatocarbau sesta, loron 30 fulan Abril.

Iha ne’e Primeiru-Ministru, Kay Rala Xanana Gusmão, simu diretamente husi Administradór sub-distritu Watukerbau. Antes atu tama ba kampania, dahuluk lideransa máximu sub-distritu hato’o jeografikamente kona-ba sub-distritu Uatocarbau. Iha okaziaun ne’e Administradór sub-distritu Uatocarbau, hato’o mós lamentasaun kona-ba projetu Pakote Refrendum (PR), ne’ebé hala’o husi kompañia, iha sub-distritu Uatocarbau ne’ebé balun iha koalidade no balun la iha koalidade.

Administradór sub-distritu Uatocarbau sujere ba Primeiru-Ministru, Kay Rala Xanana Gusmão, atu haree no tau matan ba kompañia sira ne’ebé hala’o servisu la ho koalidade no hetan rekomendasaun husi autoridade máximu sub-distritu refere.

Iha fatin hanesan Primeiru-Ministru, Kay Rala Xanana Gusmão, antes tama ba iha intervensaun, uluk nanain halo aprezentasaun ba iha Embaixador Japão, Iwao Kitahara ba komunidade sub-distritu Uatocarbau, katak durante tinan hitu resin ona seidauk iha no haree nasaun sira ne’ebé tama mai iha Timor-Leste tau atensaun ba iha estarada no ponte, maibe ita nia belun Nasaun Japão tau atensaun liu husi Orsamentu Estadu Japão ninian ba iha dezenvolvimentu iha ita rain área estrada no ponte.

Iha intervensaun Primeiru-Ministru, nian ba iha PEDN koalia ho makas katak, povu iha tinan 2010 to’o tinan 2030 labele tan hela iha uma aat, la asesu ba liña eletrisidade, ponte no estrada, bee mós no bele faan sira nia produtu ne’ebé kuda iha tos laran. Tanba PEDN hanesan biblia polítika no mata dalan ba partidu polítiku sira ne’ebé deit mak kaer Governu tenke hala’o dezenvolvimentu bazeia ba vizaun dezenvolvimentu nasionál.

Lideransa máximu iha IV Governu Konstitusionál ne’e mós destaka tan ba Xefe Aldeia, Xefe Suku no Administradór Sub-Distritu, tenke tau matan ba iha konstruksaun projetu Estadu nian ne’ebé implementa iha baze, tanba dezenvolvimentu iha baze ne’e halo ba komunidade sira ne’ebé hela duni iha baze, se’e laos autoridade lokal mak tau matan se’e mak atu tau matan.