Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, iha loron 8 fulan-jullu tinan 2021, hala’o sorumutuk ho Diretor OXFAM Timor-Leste nian, Fausto (Nino) Belo Ximenes no ninia ekipa téknika, iha Palásiu Governu, Díli.

Durante  enkontru ne’e, responsável sira husi OXFAM nian ko’alia kona-ba sira-nia servisu ne’ebé hala’o ona iha resposta emerjénsia ba populasaun ne’ebé afetada husi inundasaun iha loron 4 fulan-abríl no mós sira-nia perspetiva kona-ba prosesu realojamentu komunidade ne’ebé lakon sira-nia uma.

Ministru Fidelis Magalhães esplika katak ho hanoin ba dezafiu boot rua ne’ebé país ne’e hasoru, relasiona ho COVID-19 no ho dezastre naturál sira, Governu fahe ninia asaun entre intervensaun emerjénsia nian, rekuperasaun no rekonstrusaun ba estragu sira no resposta ba impaktu sosioekonómiku sira.

Governante ne’e hateten mós katak planu realokasaun ba populasaun ne’ebé afetada husi inundasaun prevee ba kategoria rua realojamentu nian, ida temporáriu no ida-seluk permanente, tanba ema sira ne’ebé hela iha área sira ne’ebé risku hodi sofre konsekuénsia boot dezastre naturál nian tenke muda ba fatin seluk.

Ministru ne’e salienta katak realojamentu permanente ninia prinsípiu maka devér nian hodi garante kondisaun di’ak liu duké kondisaun sira uluk ne’e, la’ós de’it iha nivel seguransa nian maibé mós kona-ba asesu ba saúde, edukasaun no asesibilidade.

Diretór OXFAM Timor-Leste nian husu ba Governu atu bele inklui mós sosiedade sivíl iha prosesu foti desizaun nian kona-ba opsaun sira realojamentu nian ba komunidade sira no mós sensibiliza ba populasaun hodi luta kontra COVID-19, liuliu iha diseminasaun kona-ba kampaña nasionál vasinasaun nian.

Ministru Fidelis Magalhães, iha nia sorin, destaka importánsia husi organizasaun sira sosiedade sivíl nian no sira-nia papel fundamentál iha demokrasia. Na’i ulun ne’e mós hateten katak Governu kontinua fó atensaun nafatin ba sira-nia preokupasaun no disponivel nafatin hodi rona sujestaun sira sosiedade sivíl nian.