Governu Timor-Leste

Ohin, loron 8 fulan-jullu tinan 2021, Vasina AstraZeneca kontra COVID-19 rihun 40 tan to’o ona mai Timor-Leste, husi Austrália.  Hamutuk, Austrália fornese ona vasina 175.000 mai Timor-Leste.

Austrália kompromete ona hodi fornese mai Timor-Leste doze vasina kontra COVID-19 ne’ebé sufisiente ba populasaun 80% ne’ebé  la abranje husi mekanizmu COVAX.

Aleinde vasina husi Austrália, vasina AstraZeneca doze 124.800, ne’ebé mai liuhusi mekanizmu COVAX nian no doze rihun 100 husi vasina Sinovac nian, ne’ebé oferese husi Xina, nune’e totál doze 399.800 vasina kontra COVID-19 to’o ona mai país.

To’o loron 6 fulan-jullu, iha nivel nasionál, administra ona totál doze 243.949, husi ne’ebé doze 224.155 uza vasina AstraZeneca no 19.797 uza vasina Sinovac.

Iha territóriu tomak, ema 217.677 (28,7% husi ema tinan 18 ba leten) simu ona doze dahuluk no ema 26.272 (3,5%) maka kompleta ona vasinasaun.

Iha Munisípiu Díli, administra ona doze dahuluk vasina kontra COVID-19 nian ba ema 115.737 (54,1%) no ema 14.418 maka simu ona doze rua ne’e (6,74%).

Iha semana liubá, bainhira vasina rihun 65 tan to’o mai, Austrália hatudu “ninia orgullu tanba fornese vasina AstraZeneca ne’ebé segura no fabrika iha Austrália, ba Timor-Leste no nasaun viziña sira seluk iha rejiaun, iha momentu ne’ebé fornesimentu globál vasina nian limitadu”.

Iha sorumutuk Konsellu Ministrus nian, iha loron 23 fulan-juñu tinan 2021 define filafali objetivu sira ba kampaña vasinasaun nian, ho objetivu atu alkansa inokulasaun rihun 10 kada loron, iha nivel nasionál.