Konsellu Ministrus aprova ona apoiu estraordináriu sira ba insersaun iha merkadu traballu
Konsellu Ministrus, iha sorumutuk loron 7 fulan-jullu tinan 2021 nian, aprova ona projetu Dekretu-Lei ba kriasaun apoiu estraordináriu sira kona-ba insersaun iha merkadu traballu nian ba benefisiáriu sira husi programa “traballu kontra remunerasaun” (cash for work), ne’ebé aprezenta husi Ministru Finansas, Rui Augusto Gomes.
Programa “traballu kontra remunerasaun” sira ne’e kria ona hodi tulun esforsu sira limpeza no rekonstrusaun nian hafoin bee sa’e iha fulan-abril liubá, ho utilizasaun maundobra lokál, iha tempu hanesan hodi disponibiliza fonte rendimentu ida ba traballadór rihun ba rihun ne’ebé la iha servisu.
Atu permite katak programa “traballu kontra remunerasaun” sira-ne’e bele iha impaktu ida ne’ebé kleur liután, hodi promove traballadór hirak-ne’e ba iha merkadu traballu nian, no insentiva ninia kontratasaun liuhusi apoiu finanseiru ba empreza no traballadór sira.
Apoiu estraordináriu sira ne’ebé kria husi diploma ida-ne’e hanesan ho ida-ne’ebé kria ona husi Orsamentu Suplementár ba jeneralidade traballadór sira nian no ne’ebé la inklui partisipante sira husi “traballu kontra remunerasaun”.
Apoiu tolu ne’ebé kria ona husi diploma ida-ne’e maka:
- Subsídiu estraordináriu insersaun nian iha merkadu traballu ne’ebé atribui ona ba entidade empregadora sira-ne’ebé selebra kontratu, válidu ba períodu ida mínimu fulan neen ho partisipante ida iha “traballu kontra remunerasaun”. Montante husi subsídiu ne’e maka hanesan 70% husi saláriu traballadór nian.
- Dispensa parsiál husi devér pagamentu kontribuisaun sira nian ba Seguransa Sosiál, husi empreza no husi traballadór: no
- Subsídiu estraordináriu dezempregu nian, ho valór 40% husi valór remunerasaun konvensionál nian ba eskalaun 1.º ne’ebé sai hanesan baze insidénsia kontributiva ba seguransa sosiál iha adezaun fakultativa.
Apoiu hirak ne’e sei implementa husi Institutu Nasionál Seguransa Sosiál nian iha koordenasaun ho SEFOPE no sei finansia husi Fundu COVID-19.
