Parlamentu Nasionál aprova iha jeneralidade ba Proposta Lei kona-ba Enkuadramentu Orsamentu Jerál Estadu no Jestaun Finanseira Públika nian
Proposta Lei kona-ba Enkuadramentu Orsamentu Jerál Estadu no Jestaun Finanseira Públika nian aprova ona iha jeneralidade husi Parlamentu Nasionál, iha sesaun plenária iha loron 6 fulan-jullu tinan 2021, ho votus afavór 37, kontra 12 no abstensaun 11.
Diploma ne’e propoin enkuadramentu foun ida ba Orsamentu Jerál Estadu no jestaun finanseira públika nian, no substitui Lei n. 13/2009, loron 21 fulan-outubru, kona-ba Orsamentu no Jestaun Finanseira.
Proposta Lei ida-ne’e introdús alterasaun lubun ida no hadi’a rejime Orsamentu Jerál Estadu no jestaun finanseira públika nian, atubele aumenta klareza, estabilidade, fleksibilidade no transparénsia. Destaka mós alterasaun sira kona-ba definisaun perímetru orsamentál, planeamentu orsamentál plurianuál, adosaun ba orsamentasaun tuir programa sira, rejime estensaun ba lei Orsamentu Jerál Estadu nian, rejime ezekusaun duodesimál no melloria husi informasaun orsamentál ne’ebé prodús ona.
Deputadu sira delibera ona mós katak, haree ba ninia espesifisidade no kompleksidade, Proposta Lei ne’e, daudaun ne’e sei analiza iha espesialidade husi Komisaun C Parlamentu Nasionál nian, ne’ebé responsavel ba asuntu Finansas Públikas. Desizaun ida ne’e hetan votus afavór 44, abstensaun 17 no laiha votu kontra.
Hafoin diskusaun iha espesialidade, Proposta Lei ne’e sei hetan apresiasaun iha plenária, ba ninia votasaun finál globál.
Partisipa iha sesaun plenária proponente sira Proposta Lei ne’e nian, hanesan Ministru Finansas, Rui Augusto Gomes no Vise-Ministra Finansas, Sara Lobo Brites.
