Governu Timor-Leste

Diploma ne’ebé kria Komisaun Luta Kontra Tráfiku Ema nian, ne’ebé aprova ona iha Konsellu Ministrus, liuhusi proposta Ministru Justisa nian, Manuel Cárceres da Costa, promulga no publika ona iha Jornál Repúblika, iha loron 30 fulan-juñu tinan 2021.

Komisaun ne’e garante ezisténsia kona-ba asaun koordenada ida entre interveniente oioin iha luta kontra tráfiku ema nian, atu nune’e define ona polítika no estratéjia nesesária sira, ba prevensaun ida ne’ebé efikás no luta kontra tráfiku ema nian. Estrutura ne’e reprezenta servisu oioin no entidade públika sira, liuliu iha área sira justisa no seguransa nian, maibé mós reprezentante sira husi sosiedade sivíl.

Kriasaun komisaun ida ne’e atu kumpre dispostu iha Lei Prevensaun no Luta Kontra Tráfiku Ema nian, no asegura ezisténsia estrutura koordenasaun interministeriál nian liuliu iha funsaun atu koordena iha nivel nasionál, entidade oioin ne’ebé responsavel ba prevensaun no luta kontra tráfiku ema nian.

Komisaun ne’e mós sei sai responsavel atu promove no asegura kooperasaun ho entidade estranjeira sira iha kombate ba tráfiku ema nian, nune’e mós atu akompaña aplikasaun ba dispozisaun konvensaun sira nian ne’ebé Timor-Leste ratifika ona ka sei ratifika iha matéria tráfiku ema nian.

Ministériu Interiór mós prepara hela implementasaun ba sistema informasaun foun ida kona-ba jestaun fronteira sira nian, MIDAS (Migration Information and Data Analysis System). Sistema ida ne’e dezenvolve ona husi Organizasaun Internasionál ba Migrasaun sira, ne’ebé permite hodi rekolla, prosesa, arkiva no analiza informasaun sira husi viajante sira iha tempu reál, no permite hodi halo monitorizasaun ba tama no sai iha territóriu ho efetivu liu. Permite mós hodi haruka konsulta automátika sira ba baze dadus INTERPOL nian no lista observasaun relevante sira seluk, atubele deteta dokumentu sira viajen nian no indivíduu sira ho potensiál hirak ne’ebé vinkuladu ba krime organizadu transnasionál, inklui tráfiku ema nian no kontrabandu emigrante sira nian.

Portavós husi Governu Konstitusionál VIII, Ministru Fidelis Manuel Leite Magalhães, afirma katak kria komisaun ida ne’e “aleindé kumpre ba dispostu iha Lei Prevensaun no Luta Kontra Tráfiku Ema nian no ba obrigasaun internasionál nian sira iha matéria ne’e, hatudu katak Timor-Leste komprometidu no empeñadu hodi tau-hamutuk esforsu nesesáriu sira hotu, hodi prevene no kombate krime hediondu ne’e, ne’ebé kontra dignidade umana”.