Ministru Prezidénsia Konsellu Ministrus hala’o sorumutuk ho Konsellu Diretivu Imprensa Nasionál
Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk, iha loron 22 fulan-juñu tinan 2021, ho Prezidente Konsellu Diretivu Imprensa Nasionál Timor-Leste, I.P. (INTL) nian, Jaime Correia, no ho membru Konsellu Diretivu INTL nian sira seluk, iha Palásiu Governu, iha Dili.
Sorumutuk ho Ministru ne’ebé tutela institutu públiku ida-ne’ebé hala’o knaar atu hatán ba nesesidade hotu-hotu kona-ba produsaun gráfika ba entidade Estadu no privada sira nian , nu’udar sorumutuk dahuluk responsavel INTL nian husi kedas sira simu pose, iha loron 14 fulan-janeiru liubá.
Iha sorumutuk ne’e, membru Konsellu Diretivu nian sira halo pontu situasaun kona-ba institutu públiku ida-ne’e ninia atividade sira, kona-ba preparasaun planu orsamentál tinan 2022 no kona-ba dezafiu no limitasaun sira ne’ebé instituisaun ne’e hasoru.
Responsavel sira husu Ministru nia apoiu atu sensibiliza membru sira Governu nian no entidade estatál sira hodi utiliza Imprensa Nasionál nia servisu sira, ne’ebé aleinde signifika poupansa ida iha gastu públiku sira, INTL garante kualidade iha servisu sira, nune’e mós, konfidensialidade no seguransa.
Hanesan saida maka Rezolusaun Governu N. 8/2016, loron 2 fulan-marsu, hateten,“organizmu estadu no entidade públika hotu-hotu tenke adkire, diretamente ba [Imprensa] Nasionál, servisu no produtu sira ne’ebé Imprensa ne’e iha kapasidade atu halo”.
Ministru Fidelis Magalhães, kongratula membru Konsellu Diretivu INTL nian sira, ne’ebé iha tempu badak no maske limitasaun ne’ebé pandemia COVID-19 nian impoin, konsege rezolve ona asuntu pendente oioin iha prosesu transformasaun INTL nian iha institutu públiku, atubele kumpre efetivamente saida maka hatuur iha Dekretu-Lei N. 1/2017, loron 15 fulan-marsu, ne’ebé kria INTL no atribui ba nia estatutu hanesan institutu públiku.
Ukun na’in ne’e sente haksolok bainhira hatene katak funsionáriu Imprensa Nasionál barak liu maka simu ona pelumenus doze ida husi vasina kontra COVID-19 nian. Ho konsiderasaun katak pandemia ne’e sai nu’udár dezafiu boot ida ba atividade normál estadu nian, importante tebetebes atu funsionáriu públiku sira simu vasina, Ministru ne’e hatutan.
Fidelis Magalhães mós hato’o disponibilidade husi servisu Prezidénsia Konsellu Ministrus nian sira atu apoia INTL, liuliu verifikasaun ba lejizlasaun ne’ebé iha kona-ba instituisaun ne’e no preparasaun diploma legál sira ne’ebé presiza hodi alkansa objetivu sira-ne’ebé propoin ona.
Aleinde Prezidente Jaime Correia, Konsellu Diretivu INTL nian, kompostu husi Beatriz Ximenes Martins, Vise-Prezidente no Vogál, Elídio da Cruz de Carvalho, Vogál no Natalino Auxiliadora de Deus, Fiskál Úniku.
