Primeiru-Ministru kompleta ona vasinasaun kontra COVID-19 no apela ba sidadaun sira nia partisipasaun másima iha kampaña vasinasaun nian
Primeiru-Ministru, Taur Matan Ruak, akompaña husi ninia kaben, Isabel da Costa Ferreira, simu ona doze daruak husi vasina AstraZeneca kontra COVID-19, iha loron 18 fulan-juñu, iha ninia rezidénsia ofisiál, iha bairru faról, Dili.
Xefe Ezekutivu ne’e fó hanoin katak “sé maka simu vasina dala rua ona bele la’o livre entre munisípiu sira no la presiza tan halo teste” ba COVID-19, presiza de’it aprezenta komprovativu kona-ba vasinasaun kompleta.
Primeiru-Ministru apela “ba sidadaun sira atu partisipa másima iha kampaña vasinasaun nian”, tanba “ ba dalauluk permite atu salva vida” no “tuirmai permite ita filafali ba normalidade, atunune’e ita bele rekupera ita-nia ekonomia”. 
Na’i-ulun ne’e mós aproveita hodi “hahii profisionál saúde nian sira, instituisaun PNTL no F-FDTL sira, voluntáriu sira, organizasaun la’ós-governamentál sira no sira hotu ne’ebé envolve ona iha kampaña vasinasaun nasionál kontra COVID-19 nian”.
Xefe Governu ne’e sente haksolok ho aumentu númeru vasina ne’ebé distribui ona no garante katak Governu halo daudaun esforsu hotu atu iha tempu badak bele simu vasina ba sira ne’ebé ho otas 18 ba kraik.
Taur Matan Ruak mak ema dahuluk iha nasaun ne’e, ne’ebé simu doze inisiál vasina nian, iha loron 7 fulan-abríl liubá, iha lansamentu kampaña vasinasaun kontra COVID-19 nian.
Hahú husi loron ne’ebá to’o loron 20 fulan-juñu, iha nivel nasionál, ema hamutuk 127.074 maka simu ona doze dahuluk vasina nian, ne’ebé ekivalente ho 16,8% husi populasaun ho otas 18 ba leten. Ema rihun 17 resin maka kompleta ona vasinasaun, ne’ebé korresponde ba 2,25% husi populasaun.
Iha Dili, ema hamutuk 96.645, 45,2% husi populasaun adultu munisípiu ida-ne’e nian, maka simu ona doze dahuluk vasina no ema hamutuk 9,208, ka 4,31% kompleta ona vasinasaun ho doze rua.
COVID-19 da’et liuhusi koronavirus foun ida ne’ebé deteta ona ba dala uluk iha fulan-dezembru tinan 2019 ninia rohan, iha Wuhan, Xina.
Iha Timor-Leste, ema na’in 19 maka mate ona husi kazu infesaun konfirmadu na’in-8.707, tuir dadus ne’ebé aprezenta iha loron 20 fulan-juñu, husi responsavel sala situasaun, Sentru Integradu Jestaun Krize nian.
Husi kedas hahú pandemia ne’e nian, koronavirus foun da’et ona ba ema millaun 179 resin iha mundu tomak no halo ema millaun 3,8 resin maka mate ona.
