Governu Timor-Leste

Ministra Saude, Odete Freitas Belo, asina ona memorandu entendimentu ida ho Embaixadór Uniaun Europeia nian (UE) iha Timor-Leste, Andrew Jacob,s no Reprezentante Organizasaun Mundiál Saúde (OMS) nian iha Timor-Leste, Arvind Mathur, ba implementasaun projetu ida kona-ba mitigasaun impaktu husi virus SARS-CoV-2 no melloria kondisaun husi ospitál referénsia lima fora husi Dili. Akordu ne’e asina iha loron 16 fulan-juñu tinan 2021, iha Otél Novo Turizmu, iha Dili.

Projetu ne’e OMS maka sei implementa durante fulan 12 no UE maka sei finansia, liuhusi Operasaun Europeia ba Protesaun Sivíl no Ajuda Umanitária (ECHO, akrónimu iha lian inglés), ho montante euro millaun 1 (kuaze USD millaun 1,2).

Inisiativa ne’e ninia objetivu prinsipál maka hakbiit jestaun kona-ba kazu SARS-CoV-2 nian iha ospitál referénsia lima iha Timor-Leste, atu nune’e bele hamenus morbilidade no mortalidade ne’ebé iha relasaun ho COVID-19.  Sei hetan benefísiu husi projetu ne’e mak Ospitál Referénsia sira hanesan Maubise nian, iha Munisípiu Ainaru, Baukau nian, Maliana nian, iha Munisípiu Bobonaru, Suai nian, iha Munisípiu Kovalima no Oekusi nian, iha Rejiaun Administrativa Espesiál Oekusi Ambenu (RAEOA).

Bazeia ba projetu ne’e, sei hakbiit kapasidade ospitál referénsia sira-nian hodi jere kazu moderadu no grave COVID-19 nian sira, liuhusi hadi’a infraestrutura sira no kapasitasaun rekursus umanus.

Ministra Odete Freitas Belo hatudu ninia laran haksolok ho parseria entre Ministériu Saúde, UE no OMS ne’e, nune’e mós, ho objetivu sira ne’ebé projetu ida-ne’e define ona.

Governante ne’e afirma katak “pandemia ida-ne’e sedu ka tarde ita sei hakat liu, maibé ita-nia objetivu la’ós de’it atu luta hasoru pandemia ida-ne’e, maibé kria sistema ida ne’ebé bele fó resposta no sobrevive iha kualkér emerjénsia saúde nian ne’ebé ita tenke hasoru iha futuru”.

Embaixadór Uniaun Europeia nian, Andrew Jacobs, dehan katak “UE iha kompromisu atu hamenus efeitu husi krize iha fronteira Europa nia laran no mós fora husi Europa. Ema sira ne’ebé presiza asisténsia umanitária iha mundu tomak mesa vulneravel de’it, no ita hotu nia responsabilidade hamutuk atu bele projete sira di’ak liu karik bele. Laiha ema ida maka seguru loloos bainhira ema hotu-hotu seidauk seguru”.

Arvind Mathur, Reprezentante OMS nian iha Timor-Leste, asume katak “finansiamentu UE nian, fó kapasidade boot liután ba OMS hodi apoia Ministériu Saúde iha resposta ba COVID-19”. Nia destaka mós “rezultadu prinsipál husi kolaborasaun ne’e maka harii no kria sistema saúde nian ida ne’ebé efisiente no reziliente liu hodi hasoru emerjénsia saúde nian no mós fornese kuidadu jerál sira ho kualidade di’ak liu ba sidadaun sira país ne’e nian”.