Ministru Prezidénsia Konsellu Ministrus hala’o sorumutuk ho responsavel UNICEF no Nasoins Unidas nian iha Timor-Leste
Ministru Prezidénsia Konsellu Ministrus nian, Fidelis Manuel Leite Magalhães, hala’o sorumutuk ba dahuluk ho Reprezentante UNICEF nian iha Timor-Leste, Bilal Aurang Zeb Durrani, dezde nia to’o iha Timor-Leste iha fulan-marsu liubá. Sorumutuk ne’e hala’o iha loron 11 fulan-juñu tinan 2021, iha Palásiu Governu. Partisipa mós iha sorumutuk ne’e maka Koordenadór-Rezidente Nasoins Unidas nian iha Timor-Leste, Roy Trivedy.
Iha enkontru ne’e, Bilal Durrani halo balansu ida kona-ba área prinsipál sira husi atuasaun UNICEF nian iha Timor-Leste, iha nivel saude, edukasaun, protesaun labarik, inkluzaun no protesaun sosiál.
Iha sorumutuk ne’e sira analiza mós pontu situasaun husi projetu kriasaun sistema identifikasaun úniku (ID Úniku, IDU), ne’ebé inisia husi Fidelis Magalhães, iha tempu ne’ebé nia kaer knaar nu’udar Ministru Reforma Lejizlativa no Asuntus Parlamentares, ne’ebé sura mós ho apoiu UNICEF nian iha preparasaun ba ninia estratéjia implementasaun nian. 
Estratéjia integrada ba implementasaun ID Úniku aprezenta ba Konsellu Ministrus foin daudaun ne’e. Projetu ne’e sei hahú implementa iha tinan ida-ne’e, no prevee katak rejistu dahuluk sei hala’o iha trimestre dahaat tinan 2022 no iha tinan 2025 nia rohan bele rejista ona ema millaun ida.
ID Úniku tama iha ámbitu Programa Refoma Administrasaun Públika no sai nu’udar baze nesesária atu hadi’a prestasaun no planeamentu servisu públiku ho forma efetiva no efisiente no asegura di’ak liután jestaun no koordenasaun kona-ba polítika sosiál, no iha tempu hanesan permite kontribui ba konstrusaun estruturada husi governasaun eletrónika iha Timor-Leste.
Ministru ne’e no reprezentante sira husi UNICEF no Nasoins Unidas analiza mós etapa sira tuirmai ba implementasaun ideia sira ne’ebé prezente iha estudu “Motór kreximentu no transformasaun setoriál Timor-Leste nian”, ne’ebé aprezenta ba membru Governu sira iha retiru ikus Ezekutivu nian. Relatóriu ne’e, ne’ebé International Growth Center (IGC) maka halo bazeia ba pedidu husi Ministru Fidelis Magalhães no sura ho apoiu Nasoins Unidas nian, buka trasa prioridade sira no fornese rekomendasaun sira hodi orienta polítika Governu nian sira atubele alkansa diversifikasaun ekonómika ida ne’ebé boot liután, iha setór la’ós mina-rai nian no koloka país iha dalan dezenvolvimentu nian ne’ebé sustentavel liután ba prazu médiu no prazu naruk. 
Ministru Prezidénsia Konsellu Ministrus nian rekoñese katak UNICEF hanesan Timor-Leste nia parseiru importante ida no agradese serbisu tomak ne’ebé organizasaun ne’e hala’o ona no liu-liu ba apoiu tomak iha prosesu akizisaun vasina no implementasaun kampaña vasinasaun hasoru COVID-19.
