Timor-Leste no Portugal asina ona Memorandu Entendimentu kona-ba Konsultas Polítikas
Ministra Negósius Estranjeirus no Kooperasaun, Adaljiza Magno, no Embaixadór Portugál nian iha Timor-Leste, José Pedro Machado Vieira, reprezenta Ministru Negósius Estranjeirus Portugál nian, ohin, loron 1 fulan-juñu tinan 2021, asina ona Memorandu Entendimentu kona-ba Konsulta Polítika ida.
Memorandu ne’e estabelese mekanizmu diálogu polítiku regulár nivel aas nian ida entre país rua ne’e, bele tinan ida dala ida ka tinan rua dala ida.
Portugál nu’udar parseiru importante ida ne’ebé kle’ur ona serbisu hamutuk ho Timor-Leste iha setór oioin.
Akordu ne’e abranje área sira hanesan edukasaun, defeza, justisa no setór kooperasaun nian sira seluk entre país rua ne’e.
Ministra Adaljiza Magno aproveita biban asina akordu ne’e nian, ne’ebé hala’o iha loron 10 fulan-juñu, loron iha ne’ebé selebra Loron Portugál nian, atu hato’o ninia kongratulasaun ba sidadaun portugés hotu-hotu iha Portugál no iha mundu, liuliu sidadaun portugés sira iha Timor-Leste, ne’ebé ohin selebra Loron Camões nian.
Baibain, tinan-tinan ita selebra loron ne’e hamutuk, maibé tanba COVID-19, tinan ne’e ita labele selebra hamutuk, maibé ho serimónia asinatura ba akordu ne’e, ita valoriza tebes nasaun rua, Timor-Leste no Portugál.
Partisipa mós iha serimónia ne’e maka Ministru Justisa, Manuel Cárceres da Costa, Vise-Ministru Negósiu Estranjeiru no Kooperasaun, Julião da Silva, Vise-Ministru Administrasaun Estatál, Lino de Jesus Torrezão, Sekretáriu Estadu Arte no Kultura, Teófilo Caldas, no dirijente sira husi instituisaun relevante sira seluk.
