Timor-Leste simu vasina 100.800 tan husi mesanismu COVAX
Ministra Saúde dr. Odete Maria Freitas Belo, MPH hamutuk ho Vise-Ministru Negosiu Estrajeiru no Kooperasaun Sr. Julião da Silva simu Vasina AstraZeneca husi COVAX Facility hamutuk doze 100.800 husi Reprezentante Unicef iha Timor-Leste Sr. Bilal Aurang Zen Durrani, iha Sala VIP, Aeroportu Internasionál, Nicolao Lobato, Comoro, Díli.
Vasina AstraZeneca ne’ebé Timor-Leste simu ho kuantidade doze 100.800 ne’e, doze 76.800 husi Covid-19 Vaccine Global Access Facility (COVAX Facility no doze 24.000 husi Governu Nova Zelandia hodi fó ba sidadaun ne’ebé mak simu ona doze dahuluk husi AstraZeneca, atu nune’e bele halo kompleta hodi simu tan doze daruak.
Iha entrevista Ministra hatete “ COVAX facility uluk ita simu iha 5 abril 2021 depois ita halo lansamentu iha 7 abril 2021 no tuir lolos ne’e ita tenki simu segundu doses iha 2 juñu maibé iha atrazu oituan , la’os atrazu tanba iha fallansu ruma lae, maibé iha parseiru seluk, iha nasaun seluk ne’ebé mak hakarak atu apoiu ita liuliu Nova Zelándia nia hakarak atu aumenta tan ninian doze 24.000 entaun duke ita lori ida COVAX nian ne’e mai mesak de’it entaun ita hein doze ne’ebé mak Nova Zelándia tau ba iha COVAX Facility nia bele mai hamutuk entaun ita hetan doze 100.800”.
Enkuantu lansamentu ba segundu doze husi vasina AstraZeneca sei hala’o iha Centru Convensoens Díli (CCD) iha loron 10 juñu 2021 ba feze daruak nian no Governu liuhusi Ministra Saúde nafatin apela ba sidadaun hotu katak moras Covid-19 ne’e eziste ona iha Timor-Leste atu hakbesik bá iha Postu Vasinasaun atu bele simu vasina.
“ita nafatin ko’alia ba ita-nia komunidade,ita-nia povu, ita-nia populasaun katak ita tenki rekoñese uluk katak moras ne’e eziste, moras ne’e iha, no moras ne’e ninian risku ne’e ba liu ita sira ne’ebé mak idade aas liu mais de 60 anós ba leten nomós ba ita sira ne’ebé mak moris hela ho moras ruma, ezemplu hanesan Tuberkoluze, Diabetes Melitus, Sofre fuan, Hipertensaun no ita sira ne’ebé mak iha ona moras ne’e Covid-19 fasil tebtebes atu halo ita moras todan liután tanba ita-nia imunidade fraku, nia aproveita situasaun ida-ne’e atu bele halo ita tama iha Óspital no bele mós oho ita iha tempu lalais no liuhusi oportunidade ida-ne’e ba ita-boot sira hanesan mídia fó sai ba ita-nia komunidade, ita-nia populasaun, ita-nia inan aman sira, ita-nia oan joven sira ne’ebé mak mais de 18 anós favor hakbesik bá iha postu vasinasaun nian atu bele hetan vasina, wainhira ita hetan vasina pelumus ita bele seguru liután atu bele halo ita-nia atividade diária sira, selae ita bá ita uza máskara ita latauk maibé nia risku ne’ebé mak nia risku atu hada’et ne’e sempre iha, mais ita uza máskara, fase nafatin liman, hadook-an husi agrupamentu ne’ebé mak barak ho tan vasina, ha’u hanoin ita bele it abele proteze ita-nia an husi Covid-19 ida-ne’e” Ministra Saúde hatete.
Iha biban ne'e Ministra hato'o agradese ba ekipa teknik husi Unicef no OMS ne'ebé sempre halo esforsu hamutuk ho Ministériu Saúde hodi asegura vasina COVAX to'o lalais iha Timor-Leste.
Partisípa Reprezentante Organizasaun Mundiál Saúde iha Timor-Leste Dr. Arvind Mathur, Representante Estadus Unidus Amérika iha Timor-Leste Sr. Charles Kevin Blacstone, Representante Uniaun Europeia iha Timor-Leste Sr. Andrew Jacobs, Embaixadór Nova Zelándia iha Timor-Leste Sr. Phillip Hewitt, Embaixadór Indonezia iha Timor-Leste Sr. Sahat Sitorus no seluk tan.
