Governu Timor-Leste

Primeiru-Ministru Taur Matan Ruak, iha loron 8 fulan-juñu tinan 2021, konvoka reuniaun ida ho Xefe Suku sira hosi iha Munisípiu Dili, ho prezensa Vise Ministru Administrasaun Estatal, Prezidente Autoridade Munisípiu Dili no Administrador Postu sira, iha Ministeriu Finansas.

Objetivu Xefe Governu konvoka reuniaun ho Xefe Suku hosi Dili ne’e, tanba Dili nu’udar episentru ba propagasaun COVID-19 daudaun ne’e, ne'ebe dalan atu hakotu korrente tranzmisaun ne'e mak liu hosi vasina, tanba ne’e, Xefe Governu hakarak rekolla informasaun hosi Xefe Suku sira kona-ba programa vasina ne’ebé daudaun ne’e la’o hela iha terenu, atu bele buka mekanizmu di’ak liutan nune’e bele involve sidadaun barak iha vasina.

Iha reuniaun refere, Xefe Governu fó oportunidade ba Xefe Suku sira hodi hato’o informasaun sira ne’ebé hasoru iha suku laran durante implementasaun faze dahuluk vasina, nune’e Xefe Suku sira hato’o preokupasaun no mós sujestaun hanesan; husu Governu se bele vasina ne’e  nu’udar obrigatóriu, husu atu halo jestaun di’ak ba tempu no fatin, hasa’e númeru pesoál  ne’ebé fó vasina, tanba komunidade daudaun ne’e entuziazmu tebes ba simu vasina, maibé númeru pesoál, vasina no livru kinur  mak kadavés la sufisiente.

Entretantu Xefe Governu rekoñese sakrifísiu Xefe Suku sira-nian iha baze ne’ebé sensibiliza no mobiliza komunidade ba simu vasina, nune’e aproveita reuniaun ne’e, Xefe Governu agradese tebes ba esforsu refere.

“Governu rekoñese nai Xefe Suku sira nia sakrifísiu no husu fó nafatin kontribuisaun, para mais ita-nia sidadaun vasina barak liután, mais loke ba normalidade foun, para atividade ekonomia no sosiál bele lao filafali”, dehan Xefe Governu.

Kona-ba opiniaun sira Xefe Suku nian, Xefe Governu hateten, sei diskute kle’an liután ho Ministériu Saúde, no ekipa Sala Situasaun atu bele hetan mekanizmu di’ak iha programa vasinasaun ne’e, nune’e bele atinji meta ne’ebé Governu define ona.

Ikus liu, Xefe Governu esplika, wainhira númeru vasina atinji ona meta, Governu iha posibilidade normaliza fali vida ekonomia no sosiál, hamamar regara sira ne’ebé durante ne’e impoin, atu komunidade sira bele sírkula livre halo atividade sósiu-ekonómiku.