Loron Mundiál Liberdade Imprensa nian
Ohin komemora loron Mundiál Liberdade Imprensa nian. Governu Repúblika Demokrátika Timor-Leste bele iha orgullu, iha 2010, tamba fo ona pasu seguru hodi hametin direitu fundamentál ida ne’e, nebé importante ba dezenvolvimentu prosesu demokratiku nasaun joven Timor-Leste ninian.
Ho asuntu ida ne’e, iha data 24 Marsu liu ba, hetan ona aprovasaun ba Polítika Nasionál ba Komunikasaun Sosiál (PNKS). Halo ho base artigo 40.º no 41.º hosi Konstituisaun nian ne’ebe koalia kona ba materia liberdade espresaun imprensa. Dokumento ne’e forte kona ba prinsípiu sira iha área sira hetan asesu informasaun, regulasaun, étika sektor komunikasaun nian, defeza lian ofisiál sira, formasaun ba jornalistas, dinamizasaun ba Rádiu no televizaun Timor-Leste no apoio ba rádioa komunitárias.
Iha âmbito ida ne’e duni, planeia tiha ona formas oinsa atu halo kooperasaun ho entidade ho ajénsia internasionál balu, nuné sei iha ka selebra protokolu ida iha tempo oin mai ho Instituto Portugeés Apoio ba Dezenvolvimentu no ho Rádio Televisaun Portuguésas, atu halo dezenvolvimentu servisu modernu ida ho kualidade ba projeksaun RTTL nu’udar empreza públika.
To’o final 2010, Sekretaria Estadu Konsellu de Ministrua (SEKM) nu’udar orgaun Governu nian nebé tutela ka iha responsabilidade, iha nia objectivu prinsipal atu defini planu ida kona ba implementasaun lolós kona ba medidas nebé maka sei foti ho baze ba Polítika Nasionál Komunikasaun Sosiál (PNKS) ninian.
Nuné mos, nu’udar forma ida atu asegura angariasaun, ka buka osan reseitas maibe RTTL respeita liberdade editorial nian maka, SEKM kompromete atu apresenta iha tempo badak nia laran, ba Konsellu de Ministrus, projektu lei ida nebé regula atividade publisitária.
Parabéns ba hotu-hotu nebé servisu iha sektor importante Komunikasaun Sosiál Nasionál ne’e, jornalistas ho orgauns Komunikasaun Sosiál hotu, ba tinan ida tan nebé prova duni dedikasaun diak ba dezenvolvimento Timor-Leste.
