Governu Timor-Leste

Ministru Prezidénsia Konsellu Ministrus nian, Fidelis Manuel Leite Magalhães, hala’o sorumutuk ho Zacarias Albano da Costa, eis-Ministru Negósius Estranjeirus Governu Konstitusionál IV nian, iha loron 4 fulan-ajuñu tinan 2021, iha Palásiu Governu, Dili.

Antigu Ministru Negósius Estranjeirus ne’e sei troka potugés Francisco Ribeiro Telles iha kargu Sekretáriu Ezekutivu Komunidade País Lian Portugés (CPLP) nian, iha fulan-jullu tinan 2021, durante simeira xefe Estadu no xefe Governu CPLP nian  sira, ne’ebé sei hala’o iha Luanda, Angola.

Sorumutuk ne’e hala’o iha ámbitu preparasaun ba lideransa sekretariadu ezekutivu CPLP nian, no diplomata ne’e defende ona to’o agora, importánsia husi CPLP ba reforsu imajen Timor-Leste nian iha mundu.

Ministru Prezidénsia Konsellu Ministrus kongratula Zacarias Albano ba ninia nomeasaun no dezeja votu susesu nian iha ninia funsaun foun sira. Ministru ne’e hato’o dala ida tan, lori Governu nia naran, votu apoiu nian ba ninia misaun no salienta katak ida-ne’e importante tebes tanba ba dala uluk maka timoroan ida hala’o knaar nu’udar Sekretáriu-Ezekutivu CPLP nian. 

CPLP harii iha loron 17 fulan-jullu tinan 1996, no konstitui husi Estadu-Membru sira maka – Angola, Brazíl, Giné-Bisau, Guiné-Ekuatoriál, Portugál, Mosambike, Saun Tomé no Prínsipe no Timor-Leste.

Organizasaun luzófona ne’e ninia objetivu maka konsertasaun polítiku-diplomátika no kooperasaun iha ninia domíniu hotu-hotu entre ninia membru sira no promosaun no defende lian portugés.