Governu Timor-Leste

Prezidente Repúblika, Francisco Guterres Lú Olo, hafoin simu tiha pedidu husi Governu, dekreta ona ohin, loron 28 fulan-maiu tinan 2021, renovasaun Estadu Emerjénsia, ba loron 30 tan, husi tuku 00:00 loron 2 fulan-juñu tinan 2021 to’o tuku 23:59 loron 1 fulan-jullu tinan 2021.

Hafoin simu tiha paresér pozitivu husi Konsellu Estadu no Konsellu Superiór Defeza no Seguransa nian, Parlamentu Nasionál, ohin, iha Plenáriu, autoriza ona Prezidente Repúblika hodi deklara estadu emerjénsia ba da-14, husi kedas pandemia COVID-19 mosu, ho votu afavór 35, abstensaun 21 no la iha votu kontra.

Governu, iha sorumutuk Konsellu Ministrus nian, iha loron-segunda oinmai, sei aprova medida sira ba ezekusaun deklarasaun estadu emerjénsia nian.

Primeiru-Ministru, Taur Matan Ruak, iha ninia intervensaun, asume katak debate ida-ne’e hala’o “iha tempu ne’ebé susar tebes no nakonu ho dezafiu”, “iha ne’ebé númeru akumuladu husi infesaun ne’ebé provoka husi SARS-CoV-2 sa’e ba rihun neen resin, sura husi inísiu pandemia nian no kuaze kazu rihun tolu nafatin klasifikadu hanesan pozitivu no ativu, iha sentru izolamentu nian oin-oin”.

Nia esplika mós katak “Governu propoin ba Señór Xefe Estadu atu renova deklarasaun estadu emerjénsia, tanba haree ba faktu katak to’o data ida-ne’e rejista ona ema na’in 15 maka mate tanba moras ne’e no tanba matenek-na’in no espesialista saúde nian sira, nasionál no internasionál, ne’ebé Governu konsulta, konkorda ho hanoin katak situasaun epidemiolójika ne’e sei kontinua aat liután ba beibeik ho númeru kazu infesaun nian foun ne’ebé aumenta”.

Xefe Governu hateten katak “maske kalohan nakukun taka orizonte ita-nia futuru besik, ita labele lakon esperansa, no fó konfiansa ba ezekusaun ne’ebé lalais husi Planu Nasionál Vasinasaun nian, ne’ebé la’o daudaun, no la’o hela iha ritmu ne’ebé di’ak no permite ona prosesu imunizasaun ba ita-nia maluk sidadaun 65,000 (rihun neenulu-resin-lima)”.

Primeiru-Ministru destaka ona katak “vasinasaun jeneraliza ba ita-nia populasaun sai hanesan estratéjia ne’ebé maka di’ak liu atu asegura protesaun ba ita-nia Povu nia saúde no moris, no mós dalan ne’ebé lalais liu atu filafali ba nomalidade, rekupera ita-nia ekonomia no harii fali ita-nia país, ho ánimu foun, determinasaun no empeñu”.

Diretora-Jerál Prestasaun Servisu Saúde nian, Odete da Silva Viegas, informa mós ba membru sira Parlamentu Nasionál nian kona-ba implementasaun planu vasinasaun kontra COVID-19. Hahú kedas husi loron 7 fulan-abríl, totál ema na’in 76.683 iha país laran tomak maka simu ona doze dahuluk husi vasina AstraZeneca kontra SARS-CoV-2. Iha Munisípiu Dili, ema na’in 63.894 maka simu ona vasina doze dahuluk nian. Iha fulan-juñu tenke hahú fó vasina doze daruak nian kontra COVID-19. Diretora-Jerál ne’e informa mós katak ohin vasina rihun 20 fornese husi Austrália to’o ona no iha semana tuir mai vasina husi mekanizmu COVAX no husi Austrália sei to’o mai iha nasaun ida-ne’e, nune’e prevee vasina hamutuk rihun 100 resin.