Ministru Ensinu Superiór, Siénsia no Kultura Prezide Sorumutuk Konsellu Reitóres
Ministru Ensinu Superiór, Siénsia no Kultura, Longuinhos dos Santos, iha loron 27 fulan-maiu tinan 2021, prezide sorumutuk Konsellu Reitóres, hodi diskute kona-ba asuntu setór ensinu superior nian, liuliu medida apoiu ba estudante sira (izensaun propinas no apoiu pulsa ba internet) ne’ebé aprova ona liu husi Lei n.º 8/2021, loron 3 fulan maiu, relasiona ho alterasaun dahuluk ba Lei n.º 14/2020, loron 29 fulan-dezembru tinan 2021, kona-ba Orsamentu Jerál Estadu nian.
Ekipa jurídika Ministériu Ensinu Superiór, Siénsia no Kultura (MESSK) nian halo aprezentasaun ida ba Magnífiku Reitór no Prezidente sira husi Instituisaun Ensinu Superiór públika no privada sira kona-ba konteúdu husi Diploma Ministeriál n.º 34/2021, loron 19 fulan-maiu, ne’ebé regulamenta izensaun pagamentu propinas ba estudante ensinu superiór sira.
Ministru asina mós Memorandu Entendimentu ida ho Reitór no Prezidente Instituisaun Ensinu Superiór públika no privada ida-idak atu asegura transferénsia orsamentu kona-ba izensaun pagamentu propinas.
Iha sorumutuk ne’e, aprezenta mós liña jerál husi projetu Dekretu-Lei, ne’ebé aprova tiha ona iha Konsellu Ministrus, atu regula implementasaun ba Liña Kréditu "Ensinu Superiór Kualidade +", ne’ebé fó apoiu finanseiru ba Instituisaun Ensinu Superiór privadu sira, ninia garantia finanseira no bonifikasaun husi juru (funan).
Sorumutuk ne’e hala’o iha Hotel Novo Turizmu, iha Lecidere, no hetan partisipasaun husi Reitór no Prezidente sira (ka reprezentante) husi Instituisaun Ensinu Superiór públika no privada hamutuk 18, Diretóra-Jerál Ensinu Superiór no Siénsia, Diretór Ezekutivu ANAAA, Prezidente Konsellu Ezekutivu INCT, tékniku no asesór sira.
